Israel Music Festival Puai Ah Hamas Pawl Kahnak In Israel Mipi 260 Leng An Thi, Hliamtuar Le Tlaih Mi An Tam, Kaphnih Mi 1,000 Leng An Thi Cang
The Chinlandpost | October 9, 2023 —
Middle East ram Israel – Gaza ramri ah Hamas pawl kahnak ah Israel Music Festival puai aa tel mipi 260 an ruak cu Israel bawmchantu phu Zaka nih an hmuh tiah tiah a chim.
Gaza- Israel ramri pawng khuate pakhat ah Music Festival an tuahnak ah Hamas hriamtlai phu nih an luh hnawh hna I mi tampi an tlaih. US, Europe ram le Israel ram nih ralhrang an si tiah an ti mi Palestine ralhrang bu nih zarhte in ah rocket 4000 hrawng in an kah. Hamas ralhrang AZA leng kai cu Israel ramchung lut in kahnak an tuah rih.
October 7 Hamas ralhrang hna kahnak in Israel ram mipi 700 leng an thihnak ah Israel lei nih lehrulh an tuah ve i Palastine mi 400 leng le a thong in hliam an tuar ve tiah theih a si.
Hamas hriamtlai cu Israel ramchung hmun 20 hrawng ah an lut i, Israel rammi cheukhat an tlaih hna tiah theih a si.
Hamas nih zarhte ni Judah biaknak (Sabbath ni) thengte ah Israel a kah, an luhhnawh i mipi tampi an thah hna, hliamtuar mi le tlaih an sinak kong ah US President telh in ram hruaitu tampi nih Hamas le Palestine cozah an mawhchiatnak hna.
Hamas nih Israel an kah ni ah Israel PM Benjamin Netanyahu lakhruak meṭing a auh colh i “Ral kan tho cang, ral chung ah kan um cang” tiah vawlei pi theih in a chim.
Gaza ralhrang Hamas hi cu Israel nih ramri ral a ngeih mi tampi lak ah pakhat lawng a si rih, a dang ramri ral tampi an um rih. An ramri poh khi ral tuknak in ramdang kut in lak mi an si caah an ral an tam. Nihin tiang US rammi 4 zong kahdohnak ah an thi i US rammi a thi mi an tam kho men rih tiah Reuters news nih a langhter.
About The Author
