Jose Mourinho Nih Final Kai Ding Phu Hnih A Chimphuan Cia; Zeitindah Na Ruah Ve?
City Hunter | 2018 June 21| Portuguese Football Manager a simi Jose Mourinho nih tukum World Cup ah group in, round of 16 in quarter final tiang a dotdot in dothlatnak le sumtahnak a tuah dih hnu ah semi final a kai ding phuli le final a kai dingmi phu hnih ruahdamhnak he a chimphuan cia chung. A chimmi hi a dik hnga maw, nangtah zeitindah na ruah ve?
Tukum Russia ah tuahmi World Cup ah ahodah semi final a kai lai i ahodah final a kai lai tiah a zumhmi le a ruahdamhmi cu atu bantuk in a chimphuan cia chung.
“Semi final ah Portugal le Brazil, cun Argentina le Germany an kai lai. Final kai ding ah Portugal Argentina ka thim hna. World Cup tuanbia ah a hmasa bik Portugal final an kai kum a si lai. 2014 kum World Cup ah an sunghmi kha Brazil nih Germany kha teirul an cham hna lai i tukum World Cup pathumnak cu Brazil nih an ngah lai. Final ah Portugal le Argentina an kai lai tikah pumpululh thapetu nih cuanh bikmi C. Ronaldo le Messi a donghnak bik an i zuamcawhnak zong a si fawn lai” tiah a chim.
“Final ah ahodah teinak a hmu lai timi ka ruahdamh kho lo. Minute 90 pin ah caanhlei pek an hauh pin ah penalty tiang an i sut lai ti ka ruah. Zaanglekcelhtu pa 11 ningte in an chuih lai. A donghnak bik ah C. Ronaldo le Messi nih penalty an chuih than lai. Cu hnu cun ka tuanvo a dih cang. Ahodah champion a co lai ti cu nanmahte in ruat ve ko cang uh” tiah a biapeh ah a chimchih.
Jose Mourinho hi Manchester United F.C ah manager zong a si. Cu lawng si lo in Coach rian hi Manchester United F.C, Chelsea F.C, Real Madrid F.C, Inter Milan, F.C Barcelona le a dangdang zong ah a tuan balmi a si.
Nangtah tukum World Cup ah ahoho dah semi final an kai lai i final an kai lai? Cun, ahodah champion a co lai tiah na zumh ve?
About The Author
