July Zarhkhatnak Chung Kyauktaga Le Yedashe Kahdohnak Ah SAC Ralkap 30 Leng An Thi
The Chinland Post | 2023 July 11 — Bago ni chuahlei Kyauktaga le Yedashe peng hna ah July zarhkhatnak chung ah SAC ralkap le PDF phufonh hna karlak ah kahdohnak a fak i SAC ralkap 30 leng an thi tiah Bago Region PDF nih thawng an thanh.
July 3 chun sml 30 hrawng ah Yedashe peng, Omedu khua in SAC ralkap 50 hrawng cu Omedu le Shansu khua karlak ah Yedashe peng PDF nih bomrap an puah hnawh hna i SAC ralkap 10 an thi, 16 an i hliam tiah an langhter.
Cun July 5 zaan sml 9:00pm hrawng ah Sipai khua le Michaungai khua karlak ah a rak lut mi SAC ralkap pawl cu PDF phufonh nih an kah ṭhan hna caah SAC ralkap 6 an thi.
Cun Kyauktaga peng zong ah July 5 chun sml 2:00pm hrawng ah SAC ralkap le EAO PDF phufonh hna cu Nanza khualu ah kahdohnak a chuak ṭhan i SAC ralkap 15 an thi, 10 hrawng Kyauktaga sizung an phan tiah an thanh.
July 6 zaanlei sml 5:50pm ah Nanza khua le Paukbin khua hlei ah an kah ṭhan hna i SAC ralkap 2 an thi, 4 hliam an tuar tiah an ṭial.
KNU Brigade 3 hmunhma ah a um mi Bago ramṭhen, Kyaukgyi peng, Mone peng, Kyauktaga peng hna ah July zarhkhatnak chung ah kahdohnak voi 11 a chuak i SAC ralkap 32 an thi, 22 an i hliam, KNLA/PDF phufonh lei in 1 a nunnak a liam i 1 aa hliam tiah July 7 ah an thanh.