Kahdohnak 50 leng ah SAC ralkap 90 deng an thi tiah KNU nih a thanh
The Chinland Post | 2022 April 19 – Karen National Union (KNU) battalion 6 hmunhma ah April 15 tiang kahdohnak voi 55 a chuak i SAC ralkap 90 deng an thi tiah KNU Headquarter nih April 18 ah a thanh.
SAC ralkap pawl nih fur a tlak hlan ah hmunhma pawl lak an duh caah kahdohnak a chuak rih ko lai tiah KNU ramdang lei rianngeitu Pado Saw Taw Ni nih RFA ah a chim.
“Kahdohnak a chuak rih kho men. An mah lei nih fur a tlak hlan ah kan doh dih lai, a hlei in hmunhma pawl lak ding an ti caah kan mah lei nih kan kham hrimhrim a hauh caah kahdohnak cu a chuak rih ko lai”.
Karen ram, Kawkareik peng chungah kahdohnak a tambik a si i SAC nih kahdohnak vanlawng an hman tiah KNU nih a langhter.
April thla cheu chungah SAC ralkap le BGF 87 an thi i 45 nih hliamhma an tuar tiah KNU nih a langhter i KNU le KNLA phukomh in minung 12 an thi i 17 nih hliamhma an tuar tiah a thanh.
Kahdohnak chung SAC hriamngan ruangah mipi 4 an thi i 8 an i hliam tiah a langhter.
CDM tuah si loin kahdohnak ruangah mipi lei a tangmi SAC ralkap 100 leng an um cang tiah a thanh Pado Saw Taw Ni nih a chim.
About The Author
