Kalaymyo Covid 19 Hrik Ngei (28) Chung In Minung (11) Sizung In An Chuak Cang

Salai Bawi Lian Sang|TCP-Kalay| October 9, 2020| Sagaing ramthen, Kalaymyo khuachung Sanmyo sang ah October 8 ni ah Yangon-Kalay High Class bur driver pakhat ah covid hrik ngei an hmuh chap.

Kalaymyo pengchung ah covid-19 hrik ngei dihlak (28) an si i nihin ni tiang siizung in chuak minung (11) an si cang caah siizung ah aa thlawp lio minung (17) an um. Mah hrik ngei(28) ah miung (23) hi Sanmyo sang ummi an si hna I October 3 hnu in nihin tiang Sanmyo sang ah zawknak hrik an hmuh ti lo caah a rauh hlan ah Sanmyo sang Stay At home seimi Lockdown cu October 12, hmaizarh nikhat ni in cun hnom piak ding in an tawlrel cuahmah cang tiah thawng kan theih.

“Siizung in a chuak cang mi zong dam in an um cio hna caah ngamdamnak le Lentecelhnak minister zung nih rikhiah mi ni (11) chung zawtnak hrik a lang ti lo ruangah siizung in an chuak khawh nak a si. Siizung in a chuak cang mi zong home quarantine zarhkhat erh an si than dih .Kalaymyo peng ah a voihnihnak covid thli a thok than ruang ah covid-19 zawtnak ngei (27) chung in Sanmyo sang ah minung (23) hrik ngei an si” tiah Pi Siammi nih cun a chim.

October 8 zan tiang ah Kalaymyo peng chung in Covid -19 pulral ruang ah Quarantine Center 19 a um cang. Khuchung Quarantine ah Kalay University, Siangsangrun No. (1), Siangsangrun No.(8), le Tida Ku Mit sizung(1), Nursing School(1) le Quarantine Facility(4) um. Ram dang tlungmi (60) ah pa(41) le Nu (20), Ramchung peng dang tlungmi(128) ah Pa(68) le Nu(60) an dihlak Quarantine lut mi(189) an um.

October 8, 2020 zan tiang ah Myanmar pumpi ah covid hrik ngei mi (22,445), sizung in a tum mi (6,366) a thimi (535) an si. Ref: Kalay IPRD