Kalaymyo Khuachung Kahdohnak Fak Ruang Ah Khuami Tampi An Zaam
The Chinland Post | 2024 March 1 — Sagaing ramṭhen, Kalaymyo khuachung ah SAC ralkap le Kalay pengkomh dothlennak phu hna karlak ah February 26 thawk in khuachung kahdohnak fak a chuak.
Cubantuk in khuachung kahdohnak fak a chuah ruang ah Kalaymyo khuami tampi cu a pawngkam khuate le himnak hmun ah an zaam hna tiah theih a si.
“Khuachung kahdohnak a fah caah Kalaymyo khuami tampi an zaam cang hna. Skat mawṭaw in a tomtom in zaam cio a si. Mawṭaw man a let 2 in a kai caah sifak deuh cu kan zaam kho hna lo” tiah Kalaymyo khuami pakhat nih The Chinland Post ah a chim.
Cheukhat cu lam hlat ah a zaam mi an um bantuk in a pawngkam a him deuh nak hmun ah aa dor mi zong an um hna tiah khuami hna chimnak in theih a si.
Kalay pengkomh PDF nih February 26 thawk in Kalay khuachung ah kahdohnak a fak cang lai caah khuachung um mi hna nih a rannak in zaam uh tiah Kalay pengkomh PDF nih February 26 nithla in thawng an thanh.
Cu ni February 26 ah Kalaymyo khuachung ah kahdohnak fak a chuak i SAC lei nih kahdohnak vanlawng in bom a thlak, thilphor Helicopter in minung le hriam thazang a chap tiah theih a si.
About The Author
