Kalaymyo Peng Ah Ralzaam 50,000 Hrawng Caah Le Eidin Le Sii Lei An Harsa Ngai
The Chinlandpost | October 20, 2023|
Kalaymyo peng thlanglei khuate kahdohnak ruangah khuate ralzaam mi 50,000 hna caah eidin le ngandamnak zohkhenh ding sii an herh lio a si tiah ralzaam mi sin in theih a si.
April, 2021 Kalaymyo thlanglei Kalay-Natchaung- Gangaw lam kam khua ah kahdohnak an thawk. Ralhrang nih Cheukhat khua ah hriamngan bomb le meithal hmang in an kah. Khuachung mipi thinphan in an um i ramlak an zaam. SAC ralhrang khuachung an um ti lo hnu ah khuachung an hun um than ti lengmang a rak si.
2021 April ah Ralhrang le Kalay Civil Army (KCA) kahdohnak hmun Sithar khua, Natchawng- Chawngkhuah,Ngapha, Hakhalay, Tanphu, Yankyiaung khua ah SAC um hmun an lak i khuachung inn le lo rawlbuk le thilri fir in an um.
2021 December 23 ah SAC le rampi ralkap lei in KKG, PDF, CNDF kahdohnak a um. Ralhrang nih phone line le internet signal an phih ton. Natchaung khua le Chaungkhuah ah Mipi 19 an thah. Inn 29 mei an khangh. Hakhalay, Tanphu, pin lei khua zongah mipi an thah mi le inn mei khangh piak a ton mi an tlawn ti lo.
2021, December 27 ni Tanphu khua an lut lio ah Mipi inn an khangh. December 28 Chaungkhuah khua an lut than. Mipi an zaam nak tlang le ram lak ah an va kah hna. Lam kam um inn 5 leng le Khrihfa biakinn mei an khangh.
December 29 ah Yezo khua ah ralhrang an um lio can ah Hakhalay le Pamonchaung khua inn mei an khangh. Mipi an thah mi zong a um.
2022 kum in 2023 tiang Kalaymyo tlanglei(Tayakhung, Ciainn, Siitar, Natchaung, Chaungkhuah,Hakhalay,Yezo, pamonchaung Tanphu, Yankyiaung, Hmandaw, Siaphu, Aungchianta, Cianthar, Siadaw, Myitthar tiva kam um khua te tam deuh cu inn le lo chuak tak in a tam deuh cu Kalaymyo khuachung ah ralzaam in an um.
2023 kum August thla Kalaymyo thlanglei Thasi khua lei kahdohnak ah SAC hriamngan kuan chungah Chemical Weapon (ဓာတုလက်နက်) an hmang.
Mah Chemical hriamngan cu Kalaymyo hrambunh Miakpi battalion in kah mi a si i kuan a tla lio ah meikhu a rawng(black coulor) anak pipi an chuah. Meikhu rim hring dildul pi a um, hngawnghrawng a thak i, taksa a lin/sa a zual, Thi a tum (blood pressure) a tla, kut ke a zeng, chikhat an lung a tlau, mipi 4000 hrawng kalaymyo khuachung ah an rak zaam.
August -September ah Kalaymyo peng, Myo Hla le Sekan (Ceikkan) khua karlak ah SAC ralkap le mipi hriamtlai phu hna karlak kahdohnak ah SAC lei nih Sekan khua Independent Presbyterian Church a hrawh I, khuami inn 200 hrawng mei an khangh I, Nihin Kalaymyo tlanglei ah kahdohnak a tam. Sekhan khua hi Chin miphun umnak khua a si I, inn 900 umnak khua pi a si.
September 27 ni ah Aung Thar Yar khua in Hmandaw khua lei ah a rak kai mi SAC le Pyusawhti phu le mipi ralkap cu Hmandaw khua pawngah kahnak a um than. Mah kahnak ah SAC lei an fak ngai.
Ni 5 chung kahnak Ralhrang kut in Aungthayar khua ah mi pakhat, September 27 Sia Phu khua in bomb thlak ruangah Siaphu khua mi 4 an thi.
October thla tiang ah Kalaymyo thlanglei Sekhan khua ah hmunhma an lak caah Sekhan khua pawngkam Sindaw, Myaung Sung, Nithlak Santa, Kyuang Chaung, Sekhan le Kalaymyo chaklei Nan Chaung khua mipi vialte nih an khua an chuah tak. Cheukhat khua pawl cu SAC ralkap khuachung an luh caan poah ah inn mei an khangh. Mipi an thah mi le tlaih mi an tlawm ti lo caah mipi tam deuh, Kalaymyo khuachung lei ah a zaam mi hi 40,000-50,000 karlak an si hna.
Ralkap lei in vanlawng, ke ralkap, GTU sianginn in miakpi, Battalion LIB (228) in miakpi, LIB (89)in miakpi, Taungphila tlangcung um miakpi le Kalaymyo hrambumh miakpi ralkap phu (Artillery’s) nih raldohnak a umnak khua lei ah an kah hna tiah theih a si.
About The Author
