May 21, 2024

Kalaymyo Peng Ah SAC Ralkap Nih PDF Sii Lei Nu Ralkap 9 Tlaih In Thong Kum 12 An Thlak Mi Hna Chung Ah Nukhat Cu Damlonak In A Zualhma Ngai

0

The Chinland Post | February 5, 2024 — Kalaymyo peng ah SAC lei nih November thla 16, 2021 kum ah PDF sii lei nu ralkap minung 9 tlaih mi thong kum 12 an thlak mi chung ah Nu Lalthanluaii (kum 20) cu thonginn chung ah ngandamlonak in mah hngal lo tiang in ni 2 chung a um cang a zualhma tuk ruang ah Kalay thong sii inn ah chiah a si tiah naihniam sin in theih a si.

SAC ralkap nih PDF sii lei nu ralkap an tlaih hna lio ah thi dengmang in a  hrem hna i tu hi damlonak phun tling tuar in an um hi a si.

Nu Lalthanluaii hi SAC nih sakhan an luhhnawh hna lio ah a hngawng ah mei thal kuan nih an khen mi a si. Hliamtuar in sii tha tein thlop lo in a um hlei ah biahalnak caan ah fak tuk in hrem tuarnak in a mit zong a fak, thonginn ah ei dinpek lo huaha in an chiah hna caah atu bantuk in nganda lonak in a um a si tiah theih a si.

Kalay peng thlanglei kap ah a um mi PDF-Kalay Battalion 3 riahbuk cu ralhrang nih November 16 zinglei sml 8:30 am hrawng ah an luh hnawh hna i PDF-Kalay sii lei tuanvo a la mi nungak 9 an tlaih hna. Ralhrang nih an luhhnawh lio ahhin atam u cu raldo ding in leng an chuah kar a si caah tlawmte lawng riahbuk ah an um.

PDF ralkap Cher Thang Puaia (kum 27), Ram Mawia(kum 26) sii lei ralkap Mai Biak Rem Chin (kum 23) cu ralhrang kahnak in an nunnak a liam tiah theih a si. PDF Battalion 3 i an tlaih mi sii lei ralkap hna cu ralhrang nih Nagarput khua ah an kalpi hna i cu Nagarput khua ah PDF-Kalay nih bawh in an rak kah hna nain mipi ralkap nih an rak kham kho hna lo.

Photo- SAC nih PDF sii lei nu ralkap mi 9 thong kum 12 thlak mi le ngandam lonak in a zual hma mi nu Lal Thanluaii

About The Author

Na ruahning rak langhter ve.. (Leave a comment)

%d bloggers like this: