Kalaymyo Sizungpi ‘Quarantine’ nak ah Thla 9 Ngakchia A Thi
Salai Bawi Lian Sang | TCP-Kalay| 2020 September 17 – Kalaymyo Sizungpi Covid-19 runvennak ‘Quarantine Center’ ah Shan ramkulh in a rak tlungmi chungkhar in Lai ngakchia thla 9 nute a thi tiah kan theih.
Kalaymyo Sizungpi ah a thimi ngakchia kong he pehtlai in, “a thimi Elizabeth hi thla 9 lawng a si rih. Shan ramkulh, Muse in a pa nih a rak tlunpi mi a si. Ngakchia nute hi thla tlinglo in a chuakmi cu a si” tiah tawlreltu sin in theih a si.
A thimi ngakchia a nu hi Palaung (Shan) miphun le hringtu a pa, Pu Van Bawi Uk (Khampat Khuami) hna i an fanu a si. An umnak Shan ramkulh ah hringtu a nu nih a kaltak hna caah le a fanu te dam lo ruang ah Muse khua in Kalaymyo ah an pafa in an hung kir hi a si.
Covid-19 zawtnak runvennak caah tiah tlungkalmi zohkhennak Kalaymyo Sizungpi ‘Quarantine Center’ ah ni 21 an chiah hna.
Hi kong ah, “Covid-19 zawtnak hrik ‘Swab Test’ lak in an check hna tik ah an pafa in zawtnak an hmu hna lo (negative) an si” tiah Carson Baptist Church Pastor Thawng Hup nih Chinland Post ah a chim.
Asinain, Pastor Thawng Hup nih cun, a thimi thla 9 ngakchia nute hi Covid-19 zawtnak rungrul an hmu lo nain, Pneumonia (nimunia) zawtnak a ngei caah sizung ah an um chap. Thla 9 ngakchia nu Elizabeth cu Oxygen thli pek in zeimawcan a um hnu ah 2020 September 16 ah a nunnak a liam” tiah a chimchap.
Nihin, September 17 zaanlei ah a ruak an vui beh lai tiah theih a si.#
About The Author
