Kalaymyo Thlanglei Kahdohnak: SAC Ralkap Captain Telh In 28 Leng An Thi

Salai Mangpau | May 29, 2023 – Sagaing ramṭhen, Kalaymyo thlanglei ah SAC ralhrang ralkap 80 leng nih, rallam an sial caah Pauh Khong khua tlanglawnglam kiangkap ah May 27 zinglei sml. 5:40 ah bomb in an puah hnawh hna i SAC ralkap Captian Tin Kyaw Thwe telh in a tlawm bik ralhrang lei ralkap 28 hlei an thih pinah tam ngai hliamhma an pu tiah theih a si.

Hliamhma a pumi bawmchan ding in Kalaymyo in Kanpale khua Nichuah thlanglei kap in a rami SAC ralkap hna cu Tharsi khua (Chawngmahkyi) kam a phanh lio May 27 zing 11:59 ah bomb (voi 2 nak) an puaknak ah ralkap 2 an thi ṭhan i hliamhma pu zong an um. Cun, Ralkap pawl hmai kal ngan ti loin, Kalaymyo lei an kir pah ah Chinsai khua ah lamkam ummi nu/va le Tharsii khua lamkam dawr a tuah mi pakhat le mipi umkal mi 2 an dihlak telh in minung 5 hna cu ralkhamtu ah tlaih in an hruai hna, tiah Kalay Urban Under Ground Movement nih an langhter.

Tlaih a tong mi an min theih a si rih lo.

Ralhrang a thimi chung in Captain Tin Kyaw Thwe hi Ralhrang ralbawi sianginn Defence Services Academy, DSA, Batch 50 nak in a dih mi a si i, Yangon ramṭhen Bahan peng ummi a si.

May thla zarhhnihnak in Kalaymyo tlanglei ah kahdohnak a tam tiah khuami sin in kan theih.

SAC Ralkap lei in Vanlawng, Ke ralkap, TU Sianginn in hriamngan miakpi, Battalion LIB 228 in miakpi, LIB 89 in miakpi, le Kalaymyo hrambumh miakpi ralkapphu (artillery’s battalion) in raldohnak a umnak khua lei ah an kah hna tiah theih a si.#