KNLA Phufonh Nih SAC Ralkap Sakhaan 5 An Kah
The Chinland Post | 2023 September 11 — Karen ram, Hpapun pengkomh, Luthaw peng, Khepu khuate pawng ah a um mi SAC ralkap sakhaan 5 cu KNLA phufonh nih September 9 ah an va kah hna tiah thawng an thanh.
Thazang 50 hrawng nih hmunhma an khuarnak Khepu sakhaan cu September 6 zinglei ah KNLA, Special Force le PDF bawm in an va kah hna i sakhaan an lak beh.
Khepu sakhaan lak kahdohnak chung ah SAC ralkap tampi an thi, KNLA phufonh lei zong in aa hliam mi an um, SAC ralkap pawl sin in hriamngan, hriamhme pawl zong an lak khawh tiah KNU thawngzamh nih a langhter.
September 7 zong ah Khepu khuate pawng ah a um mi Tufuṭhar sakhaan, Wabawṭha sakhaan, Kuaikhu sakhaan le Layhtaw SAC ralkap sakhaan 4 cu KNLA phufonh nih an va kah hna.
Sakhaan hmun 4 kahdohnak chung ah SAC ralkap 8 an thi, 8 an i hliam.
Khepu sakhaan telh in sakhaan 5 kahdohnak a dih hnu September 6-8 tiang nithum chung SAC ralkap nih Khepu khua ah bom le Machine Gun in vanlei kahdohnak an tuah tiah theih a si.
Vanlei kahdohnak pawl chung ah Khepu khua ah a um mi kum 45 pa pakhat aa hliam i inn 11, biakinn 1, sianginn 1 hna an rawk tiah theih a si.
About The Author
