Kum 2 Chung Ah SAC Ralkap 2,000 Leng Kan Thah Khawh Hna Tiah KNDF Nih A Thanh
The Chinland Post | 2023 June 7 — Karenni National Defense Force (KNDF) nih kum 2 chung ah kahdohnak voi 1,000 leng kan tuah khawh i SAC ralkap 2,069 leng kan thah hna i 41 a nung in kan tlaih hna tiah June 5 ah a thanh.
Cun tlaihmi ralkap pawl kha vawlei cung phung ning tein kan zohkhenh hna tiah a thanh fawn.
KNDF nih SAC ralkap sakhaan 10 a lak khawh i hriam phun 600 leng kan lak khawh tiah KNDF nih a thanh.
SAC nih Karen ram le Shan-Kayah ramri hna ah Brigade 66, Brigade 99, Brigade 101, BSO 2, BSO 7 hna fonh in kahdohnak a tuah tawn i Brigade 66 cu rawk cikcek in KNDF nih an doh hna caah adang Brigade in thazang an chap hna tiah KNDF nih a thanh.
Kum 2 chung ah Karen ram, Demoso peng ah kahdohnak voi 340 an tuah khawh i Loikaw peng ah kahdohnak voi 162, Hpruso peng ah kahdohnak voi 113, Bawlakhe peng ah voi 67, Shadaw peng ah voi 22, Mese peng ah voi 2, Shan-Kayah ramri, Pekon peng ah voi 170 le Pinlaung peng ah voi 49 tiah SAC ralkap he kahdohnak a chuak lengmang tiah KNDF cathanh chung ah hmuh khawh a si.
SAC nih Karen ram chung ah nifatin in vanlei kahdohnak a tuah i ralzaam le mipi umnak hmun lei ah hriamngan a kah lengmang caah mipi 152 an thi i 162 an i hliam tiah a langhter.
SAC ralkap nih an khangh ruang, hriamngan kah ruang le vanlei kahdohnak ruang ah mipi inn 422 leng, biaknak lei inn 12, sianginn 6, sikhaan 16 hna a rawk tiah an thanh.
Atulio Shan-Kayah ramri ah SAC ralkap le Karenni hriamtlai phufonh hna karlak ah kahdohnak a um peng rih tiah cathanh chung ah an langhter.
About The Author
