Kum 2 Le Cheu Leng Caan Chung Ah Ralkap Nih Hngakchia 476 An Thah Cang Hna i Hngakchia 690 An Tlaih Hna
The Chinland Post | 2023 November 3 — Ralkap nih hramhram in uknak a lak hnu kum 2 le cheu leng caan chung ah ralkap pawl nih sualnak ngei lo mipi 4,160 leng a thah cang hna i cu chung ah 11.4% a si mi minung 476 hi kumtling lo hngakchia pawl an si tiah Assistance Association For Political Prisoners (AAPP) nih a thanh.
2021 February 1 thawk in 2023 October 31 tiang AAPP nih a khawmhsuat mi cazin a si i cazin ah langhter mi nak in a taktak dirhmun ah tlaihkhih le thah a tong mi an tam chin lai tiah cathanh ah an langhter.
A thi mi chung ah nu 630 an i tel i tlaihkhih hnu ah thah a tong mi minung 1,507 tiang an phan cang tiah a langhter.
Peng le ramṭhen kip in a thi mi cazin kan zoh a si ahcun, Sagaing ramṭhen ah minung 1,500 in a tambik an phan i cu hnu ah Mandalay, Magway, Yangon, Bago le Taninthary ramṭhen hna nih an zulh.
Cun dothlennak caan chung ah sualnak ngei lo mipi a zapi 25,363 an tlaih cang hna i cu chung ah 19,693 cu atutiang hren an si rih ko tiah AAPP nihva ṭial.
Tlaih a tong mi chung ah nu 5,073 an i tel i hngakchia 690 leng an i tel.
Cun ralkap nih mipi umnak hmunhma ah tinh hramhram in vanlawng in bom a thlak, hriamngan in a kah, ralkap nih mipi an hrem hna, an tlaihhrem hna caah Myanmar rammi 2 Million leng nih innlo an zaamtak tiah UN nih a thanh.
Hmanthlak: Ralkap kut in 2022 October 19 ah Buanlung khua hngakchia a thi mi le 2023 September 28 ah Kalaymyo khua hngakchia a thi mi (Hmanthlak Hlun)
About The Author
