Kum 73 Tarpa Avoi 4nak Tanghra Camipuai A Sung Nain Hmaikum Zong Phit Than Aa Tim
Tawk Tling Thang| 2019 June 8| Mandalay khua ah kum 73 a si cang mi tarpa U Sai Aung Nyunt cu tukum in avoi 4nak tanghra camipuai a phi nain a sung tiah kan theih.
“Ka awng lo, hmaikum zong phit than kaa tim rih. Cucu a si awk a si ko. Rian tampi lakah um sawhsawh lo in ka phit I ka awn ahcun fimcawnnak caah a tha tuk lai. Hmaikum zong kaa zuam rih lai I ka phi than lai. Ka awn tiang in kaa zuam lai” tiah U Sai Aung Nyunt nih Mizzima ah a chim.
“Ka fapa hi Australia ram ah MBA Degree a lak lio ah kei mah hee aa rual mi pawl zong ka hmuh hna tikah tanghra camipuai phit than hi ka lungah a chuak than. Asinain, hlan lio tanghra ca he aa lawh ti lo caah tu lio tanghra ca cu biatak tein ka zoh ve. Awn ding hrim in ka phi lai i ka awn ah cun ramdang ah University kai ka duh, kai khawhnak ding zong in kaa zuam lai” tiah kum 73 tarpa U Sai Aung Nyunt nih camipuai a phit lai te ah arak chim.
1946 kum ah a chuak mi U Sai Aung Nyunt cu kum 18 a rak si lio ah tanghra camipuai a rak phi ko nain a rak awng khawh lo caah caan karlak ah voi hnih tiang a rak phi bal cang mi zong a si. Innchungkhar pawcawmnak lei zongah an tlamtling i a thih hlan ah aa tinh mi rian pakhat zong a si bantuk in a voili nak tiang lungdong lo in tanghra a phit hi a si.
U Sai Aung Nyunt cu tukum tanghra camipuai phit aa timhnak kong Online chung zong ah a hunglar ngaimi a si caah mizapi lei zongnih an lawmh pi cio mi pa zong a si.
U Sai Aung Ngunt cu Biology subject in Rool no: (khung-number) Ma-na-tah (534) a si i Chian-aye khua No.(5) tanghra sianginn ah a phi tiah kan theih.
Ref: Mizzima News
About The Author
