Kawl Ralkap Nih Paletwa Ah Hmunkhuar In A Kan Doh Ah Cun Kan Mah Zong Kan Cawlcangh Peng Ve Ko Lai; U Khine Thu Kha

0

Salai CungCung|2019 June 6| Kawl ralkap nih Paletwa peng ah hmunkhuar in a kan doh peng rih ko ah cun kan mah zong kilvennak in kan cawlcangh peng ve rih ko lai tiah AA lei in chimnak nawlngeitu U Khine Thu Kha nih a chim.

“AA hriamtlai ralkap cawlcanghnak hi zeiruang ah dah Chin ramkulh  Paletwa peng chung ah hin a si ti ah cun kahdohnak thlihran hoih in kan cawlcangh caah a si. Kintalin khuami tlaunak kong he pehtlai in  kanmah zeihmanh kan thei lo. Kan sin ah minung kan tlaih mi hna an um lo, tu lio thawngpang a chuak mi minung 52 an tlaunak kong zong kan thei lo. Kan sin ah a um mi  cu Febuary thla lio i Ywalay khua in kawl ralkap nih bomb an kah ti thawng theih in a zaam mi minung 124 cu mah le khua ah um ngam ti lo i kan mah lei nih kan auh mi hna cu an um. Cu pawl cu Bangladesh ramri ah hmunhma kan pek hna i tu lio cu an mah le si khawh tawk in pawcawnnak caah rian an tuan ve lio an si” tiah AA lei chimnak nawlngeitu U Khine Thu Kha nih a chim.

“Kei mah ka theih khawh tawk chim ah cun Chin ralkap CNA nih kan mah Chin ramkulh ah kan cawlcanghnak ah tu tiang ah cun zei hmanh an chim mi a um rih lo. Hi kong pawl cu Headquarters lei he aa pehtlaimi kong a si caah kei ka theithiam ve lo. AA hriamtlai ralkap nih Paletwa cu Rakhine ramkulh a si an ti mi hi cu kan mah nih kan chimter mi hna an si lo bia vaivuan a si lai. Kan mah lei nih cu bantuk bia chim ding le timh tuahnak kan ngei lo. Kan mah cu kahdohnak ruang ah tubantuk in kan um tu hi a si” tiah a chim chap.

Kahdohnak ruang ah cozah riantuantu pawl mah le tuanvo ngeihnak ah kal ngam ti lo le ralzaam an tam deuh kong he pehtlai in U Khine Thu Kha nih, “ Fak tuk in kahdohnak a chuahnak hmun ah cun  ralzaam pawl hi an um ko. Kan mah Rakhine ramkulh lei zong ah ralzaam tampi an um ve ko, tu ah cun minung a za leng an si ve cang men lai. Kahdohnak umnak ah ralzaam an um hi cu thilcaan tawnmi a si ko. Chin ramkulh Paletwa peng ah kan cawlcangh pengnak a ruang cu kahdohnak thlihran hoih in a si. Kawl rakap nih Paletwa ramkulh in an i thawn ah cun kan mah zong Paletwa ah cawlcangh ti lo in kan um kho men ko. Kawl ralkap nih Paletwa ah hmunkhuar in a kan doh peng ko ah cun kan mah zong kan cawlcangh peng ve rih ko lai” tiah a chim.

Ref: Chin World

About The Author

Na ruahning rak langhter ve.. (Leave a comment)

%d bloggers like this: