June 17, 2024

Kum 76 Tlinnak Karen National Defense Organization (KND0) Day An Tuah

0

Salai Mangpau | July 17,2023 |

July 16, 1947 kum ah dirh mi KNDO hi July 16 (nizaan) ah kum 76 tlinnak  can cu, July 16, 2023 kum, KNDO Headquarter ah an tuah i, Karen National Union (KNU) Assistant Secretary (2) Pado Saw Hla Htun, Karen miphun chung in bochan mi upa Pado Saw Ta Main Htun, KNDO ralkap bawizik Brigadier Saw Shi Lay telh in KNDO ralkap, sianghngakchia le Karen mipi tiah an dihlak mi 300 leng an i tel kho tiah Karen Information Center (KIC) thawngzamhnak nih a langhter.

KNU/ KNDO Dirhnak

Karen  nih mirang pawl sin in kanmah tein ram an kan pek te lai tiah zumnak nganpi an rak ngei. Cu ruang ah Panglong Conference zong ah, a va ngaitu (hlathlaitu) men ah an i tel. Asinain, an zumh ning bantuk  in thil a rak si ti lo. Kawlram zalennak a ngah tik ah, kawlram phunghrampi nih cun Karen State pek ding in a lungtling. Asinain, cu ram cu khoi tia a si lai ti bantuk pawl mipi sin ah theihternak le lungtlinnak (referendum) tuah hnu in hmuh ding a si. Zalennak kan hmuh ka te ah Karen kong pawl cu Karen Affairs Council in a rak tlaih. A hramthawk ahcun aa rem cang ngai, buainak ngaingai a rak um lo. A sinain, caan a hung rauh deuh tik ah, Karen le Kawl karlak ah buainak a hung chuah hnu cun, Karen nih Kawl a zum tuk lo i, Karen pawl nih Karen ram ngah ding an au chin lengmang ve.

Cutiin, Kawl le Karen karlak  buai nak, mitam deuh a si mi Kawl pawl lak ah humhim khawh nak ding le Karen ram ngah i mah tein lairel ding pawl kong halnak ding ah Karen pawl funtomnak bu Karen Central Organization Burma, Karen National Association, Karen Youth Organization and Karen National Association pawl komh in Karen National Union (KNU) timi an rak dirh. KNU an dir hnu nihra ah, KNU in  meithal tlai ralkap a si mi Karen National Defense Organization (KNDO) ti mi an hung dirh. An dirh ka tein, meithal a ngei hnu in KNDO chung ah an lut. KNU cu mirang ram nih tlawn khawh mi, phung le lam (lawyer) Saw Ba Oo Gyi cu hotu caah ah an thim. KNU le KNDO nih an au pi mi cu, kawlram Delta (မြစ်ဝကျွန်းပေါ်) kiangkap le Kawlram tanglei hmun vialte cu Karen State ah khumh ding hi a si. Kawl cozah nih cun Karen State dirh ding cu n lungtling nain, KNU/ KNDO nih an hal  mi cu an lungtlin lo ruang ah buainak, zumlonak pakhat le khat karlak ah a rak chuak chinchin.

Federal or Independence: Karen hriamtlai phu KNDO/KTA/KNU, Kachin hriamtlaiphu KIA, Shan hriamtlai phu Noom Suk Harn/SSIA/SNUF tibantuk vialte hi ‘Federal’ caah ral an rak tho lo, ‘Independence’ ca hrim ah ral a rak tho mi an si hna. Khatlei raltuk a duhlo mi nih cozah he cabuai cung i chawnh ding in an rak i zuam ve. Tlangcung hriamtlai phu lawng si lo, China communist nih a bawmh mi Communist Party of Burma (CPB) zong hi Karen tluk in an rak thawng ve, cozah thlak khawhnak lam a kawl mi an si. Culio ah China communist a rem lo mi Yunnan Muslim ralkap KMT (Kuomintang National Revolution Army) 4,200 nih Shan ram chaklei an rak lak hoi, annih hi US CIA le Thai Amry nih an bawm hna. U Nu zong nih hi KMT hriamtlai pawl ṭhawlpiak ding in UN ah a rak hal ti a si (Martin Smith.P-189).

About The Author

Na ruahning rak langhter ve.. (Leave a comment)