Naypyidaw Kah Ding In Mipi Ralkap Nih Thawngthanhnak An Tuah Hnu ah SAC Ralkap Zung Telh In Minister Zung Le Khuachung Lutnak Gate Ah Ralkap Security An Chap
Salai Mangpau | July 17,2023 |
SAC ralkap Headquarters, Naypyidaw cu NUG le dohtlennak a tuah mi mipi ralkap nih doh ding in thawngthanhnak an tuah caah Naypyidaw ralkap Ministry zung kip le khuachung lutnak gate a ralkap tampi an chap hna tiah Naypyidaw um mi sin in theih a si.
Kareni (Kayah) hrambunh KNDF bawizik Khun Pi Htu, NUG Defense Ministry zung lei in Minister U Yee Mon hna nih Naypyidaw ah kahdohnak kan tuah cang lai tiah Media sin an chim hnu in SAC ralkap nih Nayphidaw ah ralkap Security an hun chap.
“Naypyidaw chung, ralkap Ministry zunghmai kip ah Thetseh buri, thilhling in ral runvennak cu ahlan nak in tam deuh an tuah. Ralkap Ministry zungpi he aa pehtlai mi lampi vialte cu luh khawh lo ding in an kham/phit. Ralkap zungpi le adang Ministry zung pawl kal a duh mi caah zung awr lampi pakhat lawng an awn I security check hnu ah luh khawh a si” tiah Nayphidaw um zung riantuan nih a chim.
Naypyidaw khuachung lutnak, Yangon-Naypyidaw lam, Yangon-Mandalay lam hlun, Kareni (Kayah) lei in lutnak lam gate cu suimilam 24 chung ralkap security an lak i mipi an check hna.
July 16 ni ah Yangon-Naypyidaw lam Zero mile check gate ah motor a lut mi, minung pakhat cio in an check dih hna tiah thawngtheih a si.
About The Author
