Kum Saupi Inn Hlangcangmi Papek In Innhmun Pek Awk An Si; Minister Pu Sui Thio
Salai Elvis| 2018 January 23| Hakha khuachung innhmun thar samhmi ah kum saupi inn hlang i a um cangmi hna pawl hi papek deuh in innhmun pek awk an si ti a duhnak kong Chin ramkulh Lam le sul Minister Pu Sui Thio nih a chim.
“Atu lio innhmun thar samhmi hi mizei bantuk dah thimfung kan zuhter hna lai timi kan ruahnak aa khat lo. Hi kongah tuanvo ngeitu hna nih an duh ningah cun Pastor te le nuhmei pawl deuh hi papek ding an duh. Pastor te zong cu kan upat tuk ve ko hna, nuhmei zong mirum an um ve cu mu. Papek ding ahcun inn a hlang tung i kum 40 te hna a um cangmi inn a ngei bak lo mi hna pawl kha thim i 176 hrawng an tlin ah cun thimfung zuhter than hi kanmah nih cun papek deuh ding ah kan duh. Asinain hi kong zong tutan Hluttaw meting ah kan ceih than te lai” tiah lam le sul Minister Pu Sui Thio nih TCP ah a chim.
Innhmun zong thiamsang hna nih a ri an tah i phawt zamh ding an tawlrel liopi a si. Thlakhat hrawng cu an rau ve cang. Innhmun pakhat ah a bit kauh pe 60×80 hrawng in an tahpiak hna ti ka theih. Tutan ah innhmun a ting lomi zong innhmun samhding a tam lengluang ko rih caah pehzulh in samh than ding zong timhtuahnak kan ngei ko. Atu kan samhmi hi 36 square mille lawng a si rih 46.9 square mille kau in cunglei ah kan chimmi zong an kan lehcang nain kan sin ah ca a phan rih lo. Cu pinah Nawi tiva leikap Ngau Thu tlang lei zong ah inn 1000 tlum innhmun samhding zong timhtuahnak ngeih a si” tiah Minister Pu Sui Thio nih a biapeh ah a chimchap.
Tutan innhmun ekah 100 an samhmi chungah innhmun 170 tluk aa tlum lai i zeitikah dah thimfung an zuh lai mizei pawl dah papek in an zuhter hna lai timi cu a fiang rih lo. Hi ekah 100 pin ahhin tukum chung ah ekah 200 a kaumi innhmun samh chap ding zong timhtuahnak an ngei tiah theih a si. +++
About The Author
