Kum tling lo hngakchia 1,000 leng ralkap an ṭuan
The Chinland Post | 2022 March 21 – Ralkap chungah kum tling lo hngakchia 1,000 leng nih ralkap an ṭuan tiah SAC Minister of Defense General. Mya Htun U nih a chim.
March 18 Naypyidaw ah tuahmi kum tling lo hngakchia hna ralkap lut lo ding in khamnak committee meeting ah a tu bantuk in a chim hi a si.
2012 June thla in a tutiang ralkap nih a cuzaa rih lomi hngakchia a khawmh sualmi 1,029 cu ralkap sinak in chuahnak nawl an pek hna i an nu le an pa sin ah kan kirter hna. Cun, kum tling lo hngakchia ralkap 28 cu an chungkhar sin ah khirh ṭhan khawhnak hnga kan tawlrel lio a si tiah a chim.
Kum tling lo hngakchia le ralkap ṭuan a duh lomi a khawmtu rianngeitu, ralkap pawl cu a ziizut ding in kan tawlrel lio a si tiah SAC Minister of Defense nih a chim.
SAC Minister nih hngakchia cu kan rak khawmh sual hna a ti ko nain, a taktak ah luh a duhmi an tlawm tuk caah ralkap thar a khawmtu pawl nih kum tling lo hngakchia pawl kha an khawmh hramhram mi hna a si.
UN Country Task Force on Monitoring and Reporting (CTFMR) le Myanmar cozah kar ah “Kum tling lo hngakchia ralkap ṭuannak in khamnak program” cu 2012 June 27 ah minthutnak an rak ngei.
2020 June 15 ah thanhmi UN General Secretary i 2019 caah hngakchia le hriamtlai phu hna karlak buainak kum fatin report ah aa tel chihmi hngakchia ralkap ṭuan ding in khawmh le hmannak cazin in Kawl ralkap cu an hnawh i a dihdongh tiang hrawh beh khawhnak hnga kumkhat ngiatthlainak caan an pek.
Asinain, ralkap nih hramhram in uknak a lak hnu 2021 June 21 ah thanhmi UN General Secretary i hngakchia le hriamtlai phu karlak buainak kum fatin report ahcun hngakchia ralkap a hmangmi cazin ah Kawl ralkap cu an khumh ṭhan cang.
About The Author
