Kyauktaga Peng, Tamin-inkone Kahdohnak Ah SAC Ralbawi Telh In Ralkap 30 Leng An Thi Ko Tiah NUG Nih A Fehter
The Chinland Post | 2023 August 11 — Bago ramṭhen, Kyauktaga peng, Tamin-inkone khua pawng ah SAC ralkap le KNLA, PDF phufonh hna karlak ah kahdohnak a fak i SAC lei 30 leng an thi, hriam tampi zong an lak khawh tiah NUG Ministry of Defense nih a fehter.
August 9 zinglei sml 4:00am thawk in chun sml 1:00pm tiang SAC ralkap 60 hrawng he kahdohnak a fak, sml 9 a rau mi kahdohnak chung ah SAC lei 30 leng an thi i tampi an i hliam, PDF 1 a nunnak a liam ve i 1 thinphan awk um tuk lo in aa hliam. KNLA ralkap 2 an nunnak a liam tiah tiah theih a si.
Kahdohnak chung in hriam phun 21, Drone kahnak 1, bomrap kawlnak seh 1, 60MM bom le kuan tampi an lak khawh tiah an thanh.