Lam Zawh In Duhlonak A Langhtermi Siangngakchia 36 Sianginn An Phuah Hna
Aung Aung| 2018 January 28| Fimcawnnak ca hman mi tangka (budget) chap deuh ding ti duhnak langhter in lam a zawhmi sianghleiruun siangngakchia cu an tlaih hna i January 27 zan tiang ah khan minung 36 sianginn an phuah cang hna.
Mandalay Yadanapon Sianghleiruun in 14, Yaminthin Technology Sianghleiruun in 6, Meitthilar Technology Sianghleiruun in pakhat, Moehngin Degree College in 4 an si tiah theih a si.
Tubantuk in sianginn an phuahmi hna nih hin sianginn kai khawh than nak dingah zaangfahnak hal le ca tial loin fimcawnnak ca hman ding tangka karh ter ding kong tu hi pehzulh in kan chim ko lai tiah an chim. A hlan cozah bantuk khan uktu hna nih sianginn tuanvo ngei hna cung ah nawlngeihnak an ngei rih ko tiah Ko Kyaw Thiha Yee Kyaw nih a chim.
Tubantuk in duhnak a langhter mi siangngakchia sianginn phuah an simi kong ah cung lei fimcawnnak zung lei in hneek nak le nawl pek nak zeihmanh kan tuah lo. Anmah le an sianginn tuanvo ngeitu nih an tuah mi a si ko tiah Fimcawnnak zung Lutlai chang Dr. Aung Aung Minn nih a chim.
Asinain Sianghleiruun cheukhat i sianguk pawl nih cun cung lei nawl peknak in kan phuah mi hna an si tiah an chim.
Mizapi thim mi Cozah tiin auhmi NLD cozah nih tubantuk in fimcawnnak ca hman mi tangka kong ah lam a zawh mi siangngakchia sianginn phuah hi cu mizapi nih fak ngai in an soisel hna.
Raltuknak lei ca hman ding tangka hi thumh deuh in fimcawnnak ca ah chap piak ding in January 22 ah khan Mandalay Yadanapon sianghleiruun kai liomi hruainak in lam an zawh. Cu hna cu cozah nih thazaang hmang in minung 72 an tlaih hna i 25 ni ah an chungkhar sin ah kan kuat hna.
January 26 ah lam zawh nak i hruaitu pawl cu anmah le kainak sianghleiruun cio nih sianginn in an phuah hna.
Ref: BBC Burmese
About The Author
