Laukkai In Brigadier Commander 6 Kuttang Ralkap Pawl Nih Ralkap Council An Doh Ṭhan Lai
The Chinland Post | 2024 January 12 — Shan ram chaklei, Laukkai hmunhma in Brigadier Commander 6 cu ralkap council nih an tlaih hna caah cu Commander 6 kuttang ralkap pawl nih ralkap council doh ṭhan ding in an i khawm hna tiah Khit Thit nih a langhter.
“Brigadier Commander 6 sin ah a nunnak aa ap mi ralkap pawl nih hriam tlai ṭhan ding in an i khawm hna. Dothlennak phu pawl nih Lashio an doh tik ah an doh ve lai. Ralkap council nih amah hnu a chit mi pawl kha vanlawng in bom a thlak hna” tiah thawng petu pakhat nih Khit Thit ah a chim.
Ralkap council a doh ṭhan ding pawl an um lai tiah ruahdamh mi hmunhma pawl cu kahdohnak vanlawng in bom a thlak, January 11 ah Lashio khua, Mai-yaw hmunhma cu ralkap nih kahdohnak vanlawng in bom lung 37 a thlak tiah a langhter.
Laukkai ah hriam chiah in a sungpe mi Brigadier Commander 6 cu ralkap council nih an tlaih hna hnu ah Laukkai hmunhma Regionnal Operation Command, Commander in Chief Lt. Colonel Thet Hteik Lin le a ralkap pawl cu an zaam tiah Khit Thit sin in thawng theih a si.
Laukkai ah hriam chiah in a sung an pek hnu ah, Lt. Colonel Thet Hteik Lin le a ralkap pawl cu Laukkai hmunhma in Tangyan lei ah an i ṭhial, cu hnu ah ralkap council nih Brigadier Commander 6 cu Lashio ah Helicopter in a phorh hna hnu ah a tlaih hna i dantatnak a tuah hna lai ti mi thawngpang a len caah Laukkai hmunhma Regional Operation Command, Commander in Chief Lt. Thet Hteik Lin le a ralkap pawl cu Tangyan khua in an zaam tiah theih a si.
“Brigadier Commander 6 thong an thlak hna ti mi thawngpang a theih tik ah, Laukkai G1 a si mi Lt. Colonel Thet Hteik Lin le a hnuzul ralkap pawl cu Tangyan in an zaam. Cun Laukkai ah a sungpe mi Battalion Commander le ralbawi pawl an zapi cu Lashio an phak bak in thong an thlak hna. Ralbawi pawl, Battalion Commander pawl le Brigadier Commander pawl thong an thlak hna caah an duh lo. Cheukhat cu kanmah caan a phan ve te lai ti an i hngalh caah thongtlak cu an duh lo. Ralbawi ngan pawl nih an chungkhar himnak le uknak an kut cung a hmunh khawh nak lawng kha an ruat caah a zaam mi an tlawm lo” tiah ralkap chung thawng petu nih Khit Thit ah a chim.
About The Author
