Mei Inn Zi-nan Rawn Cia In

Hakha Demonstration March 1, 2021/ The Chinalnd Post

Bawi Vung Thang| TCP-Hakha| 2021 March 4| 1st February 2021 ah Ral bawi zik Min Aung Hlaing hruai mi ralkap bu nih kawl ram nawl ngeihnak cu an lak. State Administration Council (SAC) tiah an min an i bunh. Cu ralkap (SAC) nih cathanh a chuah ning ah cun 2008 kawlram phunghram ning in ram rualremlonak (emergency) ruang ah Ram hruaitu (President) nih nawlngeihnak cu ralkap sin ah kum (1) a pek chung tiah a thanh. 2008 phunghram Dal (11) cang (410) nak ah cun ram chung ah 2008 phunghram  ning in rian tuan khawh ti lo (silole) buainak a um ah cun cu he aa pehtlai mi bu hruaitu nih thang a thanh lai. Cu hnu ah President nih a herh a ti hnu ah National Defense and Security Council (Ralkap bu) he caihkhannak a ngei lai i phungphai (law) bantuk a si mi a chuah khawh. A tawinak in cun ram President lawng nih State emergency a tuah khawh. Asinain a tu ah President Win Myit nih State Emergency cathanh a tuah mi a um lo. Vice President Myit Shwe sin ah Acting President rian a kinhnak nak ca zong a um lo. Cu leng ah 2008 Phunghram dal (3) nak cang (71) ah President cu Pyidaungsu Htuttaw kuzale cheu-li-cheu-khat min thut i cheu-thum-cheu-khat hnathlak hnu lawng ah a sualnak kawl khawh a si. Cu bantuk in President Win Myit a sual kawl i sualnak a ngei mi zong a si lo. Cucaah a tu ralkap nih uknak a lak mi cu 2008 phunghram he a kalh tiah ti khawh a si.

Ralkap nih uknak an lak ning a hman lo caah mipi nih 2020 general election ah kan thim mi hna Member of Parliament (MP) hna nih Committee Representing Pyidaungsu Hluttaw (CRPH) bu cu mipi aiawh tu ding bu ah 5th February 2021 ah an dirh. CRPH nih SAC cu ruru hranghrang in khua a sa, mi hrem, mi that, le ral ram bantuk ah a ser cang tiah a ti caah 1st March 2021 ah cun Terrorist group an si cang tiah thawng a thanh. 28th February 2021 suimilamm 9:18 PM ah Reuters News nih cun a tlam bik mi nung (21) an thi i mi nung (30) hliamma an tong tiah a thanh. Social Media ah cun hi nak in tam deuh pi an si. Ralkap uknak duh lo ruang ah a nun nak a liam mi an tam deuh deuh mi pi an thawng deuh deuh ve ralkap zong an ru hrang chin ve. Hakha kha zong ah 1st March 2021 ah cun ti he tears gas he raba kawn he an kan kah ve. Mino zong (30) leng an tleih hna. Tear gas nih fak ngai in a kut mi zong an um. Ralkap nih an vel mi zong an um len. Hi bantuk in kan hmai ah temh in nak a tuar mi le thisen a phah mi hna le nunnak a liam mi hna kan hawi le kan u kan nau kan far le an dih lak cung ah kan ngeih a chia i kan thin zong a lin. An in tuar mi a lak a si lo nak ding caah mino kan dih lak rian ngan pi kan ngei ve. Philh awk an tha lo.

A tu generation X, Y, le Z nih kan doh mi ral le kan kal pi mi lam thluan hi a dih dongh tiang peh zulh a herh. 1962 ah U Ne Win hrui mi ralkap nih a tu ban tuk in uknak a lak. Cu lio ah generation X pawl nih an rak doh. A dongh tiang an kal pi kho lo. 1988 ah voi khat generation Y pawl nih an thawh pi than. A dongh tiang an kal pi kho than lo. A tu 2021 ah an mah nih a tial cio mi phunghram pi (mipi hmanh nih kan duh na lo bu in kan zulhmi) cu an buar rialmal i an mah le chungkhar that nak ca lawng ruah in hriamnam bochan in uknak cu an lak than. Hi thil an tuah mi cu zoh sawhsawh awk le ngeihthiam awk thil an si hrim lo. Generation Z nih kan tei hlan lo nan kan hruai lai. Kan tei hlan lo kan doh lai. 62 ah kan pu/pa le an thah hna. 88 ah kan U le tampi an thah than hna. 21 ah generation Z tampi an thah than cang hna. 21 ah hi bantuk uknak kan tei lo ah cun next generation pawl lam cung an phan than lai i an nunnak a liam rih lai. Cucaah tu tan cu kan tei hlan tiang kan doh hrim hrim ding a si.

Ralkap cu hriamnam an i bochan. Kan nih cun fimnak kan i bochan. Ralkap uknak tha lo ral kan doh tik ah nonviolence fimnak kan i bochan. Kan hriamnam cu Civil Disobedience Movement (CDM) a si. Phundang in kan chim ah cun SAC nih khua a khan mi le nawl a chuah mi zei hmah zulh lo ding a si. Zung kai uh an ti ah cun zung kai lo ding. Rian an kan pek ah cun cohlan lo ding. Kal uh an ti ah cun um ding. Um uh an ti ah cun kal ding. An nawl zei hmanh ngeih lo zulh lo ding. An rian tuan nak tlamtlin ter lo ding kha a bia pi mi cu a si. Hi bantuk thil kan tuah lai tik ah ralkap nih hramhram in tuah ter le tuan ter zong a um. Thil fawi mi cu a si lo. Sihmanhsehlaw mah leng in mipi nih hriamnam tha kan ngei rih lo. Fimkhur tein tuah a herh ve. Hi CDM kan hlawh a tlin ah cun kan tei khawh ko lai. Khat lei kap in kan chim than ah cun mah pum pak runvennak caah a dang hriamnam zong kan i ral rin ding a si ve. A kar lak ah zei thil kan ton lai chim khawh a si lo caah a tha bik le a chia bik kan ton ding ruah chih in kan i thimh tuah a herh.

Ralkap uk nak tha lo hi a ci hmih a hau. Hriamnam kan ngei ai pat tiin kan duh tik poh ah uk nak kan lak lai i mipi kan ke tang ah kan chiah khawh hna ti mi ruahnak hrim hrim kan thio a herh. Ralkap uknak tha lo a nun ter tu a hram pi pathum a um tiah ka zumh. Cu hna cu Hriamnam, phaisa (U Paing company), le political party (USDP) an si. 2008 phunghram pi hrimhrim nih a thawn ter ti khawh zong a si. A tu tan ah cun 2008 phunghram cu um rih ko seh law a cung pathum kong tu hi lanhter ka duh deuh. Hriamnam – ralkap nih hrimnam cu tayavun (legal) tein thleihnak nawl an ngei. Phaisa – U Paing company in phaisa tam pi an hmuh. Party – party in mi an lem. Ramkhel ah an i thlak khawh. Hi pathum hi hrawh piak a herh. Justice for Myanmar zong nih ralkap phaisa an hmuhnak company pawl cazin a chuah. Cu hna cu cawk lo ding le hman lo ding. Justice for Myanmar facebook page ah zoh khawh a si. An phaisa hmuhnak kan phih khawh ah cun zei rian hmanh an tuan kho ti lai lo. Cun an party ah i tel lo ding. Me pek lo ding. Ho hmanh nih kan dir pi hna lo cun an party tha zang a ngei lai lo. An Hriamnam bel cu chuh khawh a si lai lo. Sihmanhsehlaw a dang in control khawh nak lam tam pi a um ko (e.g. phungphai le mipi nih hriamnam ngeihnak nawl pek tbt). A bik in an phaisa hmuhnak phih piak le an mah he i fonh lo ding a biapi tuk. Cucu kan hriamnam tha bik daihnak (nonviolence) tein Ralkap uknak tha lo a ci kan hmih khawhnak lam pakhat a si ve.

A tu kan caan cu kan tei lai maw tei lai lo? tiah bia hal nak um ding a si ti lo. “Kan tei hlan kan doh lai” timi lung put he mipi dih lak i bomh in kan doh ding a si. Kan tei hrimhrim a herh. A ho poh kan i tel a biapi tuk. Hi ral kan dohnak ah kan ton ding thil theih khawh si lo. Kan ruahnak leng in a fawi kho. A har kho. Cucaah Generation X, Y le Z hna nih kan mei in zi-nan rawn cia in kan chiah a herh. Bible caah kan hmuh bang nupi thi pa a rat lio i mei inn zi-naan rawn cio in a chia mi lawng nih nupi thit puai ah an luh khawh bantuk in hi kan doh mi ralkap uknak tha lo kan tei khawh i teinak puai kan tuah tik ah kan dih lak kan i tel khawh nak hnga kan mei inn zi-nan rawn cia ding in kan sawm hna. Kan Tei Hrim Lai!

 

 

Na ruahning rak langhter ve.. (Leave a comment)

%d bloggers like this: