Min Aung Hlaing Le SAC A Bawmchan Tu India Central Cozah Dirhmun Aa Thlen Lo Ahcun Myanmar Ram Mipi Le Tlangchung Mipi Hna Lungfahnak A Dai Ve Lai Lo
The Chinlandpost | January 17, 2024 — Myanmar le India ramri hi 1021 mile aa tlai mi innpawng neihniam a si i Khuapau dohthlennak ah Myanmar mipi hna chung ah India cozah dirhmun hi Myanmar mipi nih harnak tuar, lungfahnak a tuar mi mipi lei ah India cozah a dir lo.
India ram chung ah phun tampi in ralhrang a si mi hruaitu karlak ah Democracy mei a ceu tuk cang mi Democracy kong, nuhrin covo ah putamen ram hna le zatlang bu hna nih zoh peng mi ram a si.
Sihmahsehlaw khuapau dohtlennak ah khuaram nih a herh mi, ramchung mipi le SAC karlak zuamcawhnak tang ah India cozah nih SAC ralhrang lei mipi cung ah nuhrin covo buar in duhpoah harnak a pek mi Democracy hmuhnak ding ah le mah tein khuakhan lairelnak nawl duh in mipi authawng cu India cozah pi nih theih ter lo in SAC ralhrang lei ah a ṭanpi peng rih.
Cucaah India cozah pi le India mipi thathnemnak kha zohchunh in Myanmar mipi duh mi Democracy kong ah nihin tiang India cozah dihhmun hi a caan a tlai ngai cang.
Khuapau dohthlennak caan karlak ah India ram chung ah SAC ralkap cu hriamnam he lutnak nawl a awn mi hi Myanmar ram mipi lung a fahter. SAC ralhrang nih dohthlennak a tuah mi bu kahdoh ruang ah Chin ramkulh, Sagaing ramthen um SAC ralkap nih an sakhan chuah tak in India, Mizoram chung ah lut in an i dor hna.
India central cozah pi nih SAC ralhrang lei tanh in tha tein donnak le sii a thlop hna hnu ah vanlawng in SAC ralkap pawl cu Myanmar ah a kuat than mi ralkap hi nihin tiang ah 400 leng an phan cang.
SAC ralhrang pawl cu India central cozah nih hunhimnak lak in Myanmar ah a kuat hna. Ramri lei in khat lei ram lut hi khuapau dohtlennak caan ah thil tampi a chuak mi ah India ram bantuk in a za in a lut mi hi an um tuk lem lo. Thai-Karen ramri SAC ralkap zong Thai ram ah a zaam mi tlawnte an um ve. Myanmar he inn pawng ah Tuluk, Thai, Laos, Bangladesh le India ram hna an si.
SAC ralkap pawl innpawng ram a lut mi ah tamdeuh cu hriamnam lo in an lut, hriam he a lut mi an um ahcun an hriamnam an lakpiak hna. India ram cu mah bantuk a si lo.
SAC ralhrang nih hriamnam he India ram luh aa awnh hna, SAC ralkap nih mipi kahdoh than ding in an ram ah tha tein a kuat than hna lengmang mi hmuh khawh a si caah SAC raldohnak ah SAC lei tang in India cozah pi aa tel ve hnga maw tiah Myanmar ramkhel mi hna an hmuh ning a si.
Myanmar ram mipi harnak a tong mi an zaam tik ah mipi hna cung ah India Central cozah nih hriannam he a lutmi SAC he rual tein dawtnak a langhter maw? Ti hi ruah lo tha lo in a um.
India-Myanmar ramri, India lei kap Mizoram lei ah Rakhine khua pawl, Paletwa le Rakhine ram in ralzaam pawl cu Assam rifle nih harnak a pek ngai hna. Cun, Minipur lei a lut mi Myanmar mipi ralzaam zong a tlaih hna. Mizoram lei nihcun Myanmar mipi ralzaam lutnak aa awnh. Tha tein a zohkhenh. Assam rifle dai tein a um.
December 28, 2022 kum ah ralzaam pawl cu Assam Rifle ralkap hna nih an hren hna, kut an thlak, lungthin zawtnak thil phun tampi an tuah mi hmuh khawh a si. Mah hi nu hrim covo buarnak a si.
SAC ralkap pawl hriamnam he India ram a lutmi cu tha tein a don hna, mipi ralkap nih an phorh mi hriamnam tu cu an tlaih lengmang hna tik ah mi lungthin a buar ter ngai. Mah kong hi Bia halnak tampi zong a chuak.
India cozah nih SAC ralhrang lei a dirkamhnak pakhat cu dohthlennak lei thawngpang a thanh. India-Myanmar ramri a um mi dohthlennak bu hna cawlcanghnak le thawngpang, an biaruahnak, telegram le Satellite in biachim mi hi India cozah lei nih mipi biathli ngaih in Naypitaw ah thawng a pek ti a si.
Mah bantuk in India nih thawng a pek mi hi 1027 operation ah unau hawikom phu 3 rual hna nih SAC an tlaih mi ralkap pawl nih an chim hlei ah CDM a tuah mi bawi zong nih an chim ve caah dohthlennak bu le Myanmar mipi duh mi Democracy le mah tein khua khan lairelnak hmuhnak kong ah India cozah pi nih SAC lei kap a dir hi ruah lo awk a tha lo.
Cun mipi thahnak ding ah SAC nih uknak a lak hnu ah India cozah nih hriamnam zuar in a bawmh fawn hna.
Democracy a duh mi bawmchan lo in SAC ralhrang lei kap a bawmh mi hi Democracy ramngan pi pakhat dirhmun he aa ral kah ngai. Myanmar ram chung a um mi India ram he zungzal aa pehtlai ding mi hi Myanmar mipi an si. Myanmar mipi duhnak dohkalh in SAC lei a bawmh peng mi hi India mipi chawlehnak a dohkalh bantuk a si.
Myanmar mipi cu SAC ralhrang kuttang ah caan saupi a rak um cang caah nihin khuapau dohthlennak caan ah SAC cu a ngaih mi tangka, nunnak pek in an doh lio caan a si caah a bik in, inn pawngkam a si mi India cozah nih mipi bawmh a herh lio caan te a si.
Myanmar ram lei kap nih khuapau dohthlennak in a chuak mi NUG cozah le mipi hriamtlai bu hna zong nih Myanmar mipi cung ah India dirhmun le tuahsernak hi tha tein a zohfian peng a herh.
India cozah nihin a dirhmun zoh tik ah SAC ralhrang a bawmh peng mi aa thlen lo ahcun Democracy duh in dohthlennak a tuah cuahmah mi Myanmar mipi le tlangcung mi hna an lungfahnak cu India cozah cung ah a um peng ko lai.
Credit: Yangon Khet Tit Media
About The Author
