July 25, 2024

Miphun Kip Zungkhar Ni Tuahpiak Kan Tim Hna Lo; Minister Nai Thet Lwin

0

City Hunter| 2018 June 4| Ramkulh Ni (State Day) telh in ramkulh chung ah a ummi Miphun hrambunhmi Miphu Ni, Kumthar tibantuk nisunglawi pawl phungningte in zungkhar piak ding timhtuahnak nan ngei maw ngei lo timi hluttaw biahalnak he pehtlai in Tlangcung Miphun Kongkau Minister Nai Thet Lwin nih kan ngei lo tiah a leh.

Ramkulh Ni telh in ramkulh pakhat chung ah ummi Miphun hrambunh Miphun Ni, Kumthar Ni tibantuk nisunglawi pawl hi mah le ramkulh cio ah phungninge in zungkhar ni ah tuahpiak ding timhtuahnak nan ngei maw ngei lo tiah June 1 ahkhan Pyithu hluttaw tonpumhnak ah Rakhine Miphun Party in U Phe Taan nih a hal.

“Ramkulh pasarih hi Ramkulh Ni (State Day) hi zungkhar ni ah tuahpiak a si ahcun ramkulh kip in zungkhar ni nikhat cio aa chap lai. Cu tikah ah kumkhat ah zungkhar ni zapi hi ni 130 renglo a si lai caah zungkhar ni ah tuahpiak awk a tha lo” tiah Tlangcung Miphun Kongkau (Ethnic Affair) Minister Nai Thet Lwin nih hluttaw ah bialehnak a tuah.

“Tlangcung miphun 130 renglo a um caah miphun tengnge kip Miphun Ni le Kumthar Ni pawl zungkhar ni ah tuahpiak a si ahcun zungkhar ni a tamtuk lai. Ramkomh cozah nih bia a khiah khawh lomi hi bantuk kong cu ramthen le ramkulh hluttaw ah kau deuh le thuk in ceihmai biakhiahnak tuah i tawlrel dingmi a si” tiah a chimchih.

Atu lio ah tlangcung mi he pehtlai in ramkulh ni, Miphun ni pawl caanhmaannak cu ramkulh cozah bu le tlangcung mibu hna tawlrelnak in tuah an si. Chuekhat Tlangcung miphun hna i ramkulh ni le miphun ni hna hi panglong hnatlaknak biahren he aa pehtlaimi ni hna an si.

“Tlangcung Miphun lungrualnak timi cu hmurka men in chim awk a tha lo. Tlangcung Miphun hna covo pek i ramkomh lungput thanchoternak caah nisunglawi pawl zungkhar ni ah tuahpiak a herh” tiah Maypung peng Pyithu hluttaw palai U Phe Taan nih a chim.

Atu bantuk in biahalmi hi atu liklek ti awk in an halmi biahalnak a si i hmailei zong ah an hal rih ko lai. Cucaah, ramkulh kip in nisunglawi pawl zungkhar ni tuahpiaknak caah ramkomh cozah sin ah chuahpi le tawlrel ding in kaan nawl hna tiah Pyithu hluttaw Speaker T. Khun Myat nih hluttaw tonpumhnak ah a chim.
Ref: BBC Burmese

About The Author

Na ruahning rak langhter ve.. (Leave a comment)