June 17, 2024

Mizoram Ah Tlanglawng Lam Hlei An Sak Lio Mi A Cim, Minung 20 Leng An Thi

0

Salai Mangpau | 2023 August 24 — India, Mizoram chung um Aizawl pengkomh, Sairang khuapawng tlanglawng lam a cimh ruang ah minung 20 leng an thi tiah theih a si.

 August 23 zing suimilam 9:30 hrawng ah khan Mizoram chung ,Bairabi le Sairang kar tlanglawng lam hlei number 196 cu ruah lopi in a cimh ruang ah riantuantu 26 an thi. August zaanlei 5:30pm tiang ah mithi ruak 18 an lak khawh cang hna tiah Mizoram News in theih a si.

Mah hlei hi Sairang khua Zero point khuapawng Kurung tiva ah sak mi tlanglawng lam donhhlei a si i hlei cim ruang ah hliam a pu mi 3 cu Aizawl siizung ah an kal pi hna.

Khamrang le Sihhmui khua karlak ah tlanglawng lam ding i ser mi hlei cu a cim. Hlei hi tlamtling tein dawnh(ser) a si hlan ah a rawk tiah theih a si.

Atu tlanglawng lam hi Myanmar ram nih kum caan saupi an rak hngah mi Sittwe tilawng dinhnak awnnak a tuah hnu ah India tlanglawng Department nih Myanmar le Mizoram karlak tlanglawng lam tuah ding in 2023, August zarhhnihnak ah thawngthanhnak a rak tuah.

Mizoram chung, Bairabi le Sairang khua karlak i tlanglawng lam hi Northeast Frontier Railways (NFR) pawl nih an ser mi lam a si. Tlanglawng lam hi 51.35 km a sau mi a si i 2021 khan ser hram an rak thawk. Atu 2023 December thla ah hin ser dih ding in timhtuah a si.

Myanmar ramri he neihniam Mizoram Aizawl- Zorinpui in Habitchuwa tiang 223 Km a sau mi tlanglawng lam tuahnak ding ah tlanglawng lam a sau le a kalnak ding vialte mengtung tah a si dihnak kong zong India tlanglawng department lei nih an rak chim. Cun project pi aa lim ahcun Nepal ram le Bhutan ram ca tiang  santlainak tampi a chuahpi lai tiah an chim.

About The Author

Na ruahning rak langhter ve.. (Leave a comment)