Mizoram i Myanmar ralzaam hna kong American cozah rianngeitu pawl he bia an i ruah
The Chinland Post | 2022 September 13 – American ram a phanmi Mizoram fimcawnnak Minister Pu Lalchandama Ralte cu Washington D.C, State Department i rianngeitu pawl he September 10 an an i tong i Mizoram chung ah aa dormi Myanmar ralzaam hna dirhmun kong ceihhmainak an ngei tiah theih a si.
Tonnak ah Mizoram fimcawnnak Minister nih Mizoram cozah, biaknak lei le mipi phu nih Mizoram chungah a rak lutmi Myanmar ralzaam hna an zohkhenhnak hna dirhmun, Ralzaam hngakchia pawl hna ca an cawnnak dirhmun, sianginn hmanmi cauk le chuncaw a lak in an peknak hna kong ceihhmainak an ngei tiah Mizoram cozah nih a thanh.
Atulio ah ralzaam hngakchia an karh chin bantuk in herhbaumi zong a tam chin caah bawmhnak pek ding harnak a ummi zong kha India cozah sin ah an phuan tiah fimcawnnak Minister nih a chim.
American cozah lei rianngeitu pawl zong nih Myanmar ralzaam pawl an cohlannak hna cungah Mizoram cozah, biaknak lei phu le mipi phu cungah an lung aa lawm i ralzaam pawl he pehtlai in American nih Mizoram cozah le India cozah he rian kan ṭuanṭi kho tiah an leh ve hna.
