MNDAA le SAC Ralkap Karlak Ah Kahdohnak A Chuak
The Chinland Post | 2023 June 30 — Shan ram chaklei, Kokang hmunhma June 29 ah kahdohnak a chuak i SAC ralkap a thi mi an um tiah Kokang thawngzamh nih an langhter.
June 29 ah Kokang hmunhma, Monekoe pengkomh hmunhma pakhat ah kahdohnak a chuah hi a si tiah an langhter.
“Kahdohnak chung ah SAC lei 5 an thi tiah kan theih. Asinain in a fiang mi thawng kan thei rih lo. Monekoe pengkomh chung ah a si” tiah Kokang tualchung mi pakhat nih People’s Spring ah a chim.
Kachin thawngzamh Kachinwaves nih kahdohnak dirhmun a langhter mi ahcun, June 29 ni Muse peng, Monekoe hmunhma ah a rak lut mi SAC ralkap le MNDAA hna cu June 29 ah kahdohnak a chuak i MNDAA lei 3 hliam an tuar i SAC lei a thi mi cazin a fiang in theih a si rih lo tiah an langhter.
June thla zarhkhatnak chung ah Kokang, Monekone, Laukking hmunhma ah SAC ralkap pawl an rak luh caah MNDAA he kahdohnak a chuak.