Myanaung Peng Ah Pension La Cia Ralkap Le Ralkap Thongtla Pawl Ralkap Ṭuanter Than An Si
The Chinland Post| January 27, 2024 — Ayeyarwaddy ramṭhen, Myanaung peng um ralkap pension cia le ralkap in thongtla minung 60 nak tlawn lo cu Peng ralkap pension bu nih peng hunhimnak ding ah rian fial an si tiah thawngtheih a si. Peng ralkap pension bu nih January 17 ah Sml 2:00pm chung meeting auh in mah kong cu an ceih.
“Ralkap thazang ser ṭhan ding in meeting an tuah, Pension la cia mi kum 65 hrawng le ralkap chung in sualtuahnak ruang ah thongtla mi pawl cu meeting ah an auh hna. Peng chung le sang kip um cazin an lak, zing Sml 10:00 in chun 1:00 tiang meeting an tuah. Khuapi chung ah ralkap thazang an tlawn caah mi an herh ruang ah a si ko” tiah peng ralkap pension bu hruaitu pakhat nih Ayeyarwarddy times ah a chim.
An meeting auh mi ah kum 65 hrawng minung pension cia minung 25 le ralkap tuan lio sual tuah ruang ah thongtla mi 35 cu khuapi chung hunhimnak ding ah minthut ter in rianṭuan ter an timh hna hi a si.
“Meeting aa kai mi pension 25 nih rian ṭuan than ding in hramhram in min an thut, thongtla mi pumrua tha zong an i tel, thlahlawh le meithal pek an si lai. Khuachung hunhimnak ding ah riantuan ter than an si lai. Ralkap tuan duh ti lo caah pension la mi cu atu hramhram in riantuan ter than an kan timh hi a si” tiah pension la cia mi nih a chim.
Myanaung peng he naihniam mi Kyangin peng zong ah palek an tlawn thluahmah caah peng chung palek sakhan ah SAC ralkap le Pyusawhti -Pyituhsit ralkap 30 cu Palek Uniform hruk in an um tiah theih a si.
Sagaing ramṭhen, Kanbalu peng zong ah SAC ralkap 400 leng cu ralram an kal ter hna i thongtla mi cu thonginn luatnak kan i pek hna lai tiah thong chung in an chuah hna hnu ah meithal tlaih in ralram an kal ter hna.
January 24 ah SAC chungtel 400 leng cu Shwe Bo pengkomh in Khin Oo peng chung an rak luh lio ah cheukhat cu mipi ralkap umnak ah an rak zaam, mah a zaam mi hna biahalnak ah thongtla hna meithal tlaih ter in ral hmun ah an kal ter tiah theih a si.
About The Author
