Unau Hawikom Phu He SAC Kan Doh Lai Tiah PNLO Nih Thanhca An Chuah
The Chinland Post| January 27, 2024 — NCA hnatlaknak min a thu mi Pa-Oh National Liberation Organization (PNLO) nih SAC kan doh lai tiah January 26 zaan ah thanhca an chuah.
SAC ralkap uknak a dih tiang mipi he hmunkhat raldoh ti ding le Federal Democracy phunglam zul in Unau hawikom phu he hmunkhat ah radoh ṭi ding in ca an chuah.
Cun,“Nihin raldohnak he pehtlai in Pa-Oh miphun karlak ah kahdohnak kan tuah lai lo, SAC uknak kuttang ah rian a tuan mi Pa-Oh min pu in hriamnam a tlai mi bu pawl miphun luatnak ding lam thluan ah dir ding in forhfial nan si” tiah SAC lei tang U Aung Khan Hti PNO hruai mi nih Pyituhsit pawl sin ah cu bia cu an chim.
PNLO/PNLA le tangti phu hna ti in January 24 ni ah Shan ram thlanglei Hsi Hseng khua um SAC ralkap sakhan le palek sakhan kahdohnak an tuah I peng ning in an lak hnu ah SAC lei nih bom an thlak hnawh hna.
SAC nih uknak a lak hnu ah NCA minthut in SAC he pehtlainak a ngei mi hriamtlai bu – PPST bu 7 chung in PNLO cu SAC he NCA minthu mi bu lak ah a hmasa bik dohthlennak a tuah mi bu a hun si. Atang rih mi PPST ah aa tel mi cu Shan ram thlanglei um Shan State Army-RCSS/SSA bu pakhat hi thazang thawng a ngei mi an si i bu dang cu thazang der mi bu an si hna tiah People’s Spring media nih a tarlangh.
About The Author
