Myanmar Idol Hlasak Zuamnak Ah Chinmi Pali An Kai Cang

Avoi 4nk Kawlram pumpi hlasak zuamnak (Myanmar Idol Season 4) ah Judge Audition in Chinmi aa zuammi chung in milung pali hna cu zuamnak ah i tel kho ding in an kai cang tiah kan theih.

Cu a kaimi hna cu Hakha in Rangoon ah aa zuammi Esther Dawt Chin Sung, Kalay in aa zuammi Benjamin Sum le Bawih Zung Kim, le Mindat in aa zuammi Salai Yaw Kee hna an si tiah kan theih.

Esther Dawt Chin Sung cu i zuamnak ah miraang hla Lady Ga Ga sakmi Shallow timi le Kawlhla in Nay Nay sakmi “မိန္းကေလး အခ်စ္ပါ” timi in aa zuam. Benjamin Sum cu Mirang hla in “Halleluijah” timi le a dang Kawlhla pakhat in a sak. Bawih Zung Kim cu “ေဖေဖ” timi hla in a si i Salai Yaw Kee cu amah pumpak hla a simi “သတ္ၿပီးမွသြား” timi hla in aa zuam i atu bantuk in an dihlak in an kai hi a si.

Anmah pali lak ah Esther Dawt Chin Sung, Benjamin Sum le Salai Yaw Kee nih mark petu (Judge) nih an uar bik hna. Benjamin Sum a hla sak lio cu mark petu a simi Phyu Phyu Kyaw Thein nih kut bengh in a dirpiak i “Your deserve my stading ovation” – Dirpiak pah le kut benghpiak pah in conghlomh na phu tiah a thangthat. Esther Dawt Chin Sung zong mark petu nih an uar khunnak capo pah in an langhter ve.

Hi a zuammi vialte lak ah mipi lei thapek nak hi Esther Dawt Chin Sung nih a ngah bik i, Kawlram hlasak minthang Yun Lay le hlaphuah le hlasak minthang Min Khaing zong nih mizapi nih tha pek ding ah le Idol Winner a ngah kho tu a si tiah an Facebook ah Esther a hlasaknak cu an tar.

Myanmar Idol hlasak zuamnak ah a hlan ah voi thum an rak tuah bal cang i atutan hi a voi 4nk a si.

A voikhat hla sak zuamnak ah Karen pa Saw LaSaw Lah Htaw Wah Winner a co i, a voi 2nk ah Rakhine pa Thar Nge le avoi 3nk ah Kawlmi in Phyo Myat Aung nih a ngah.

Myanmar Idol zuamnak ah mark petu nih Top Ten tiang lawng an thim hna i Top Ten hnu in cun mizapi nih Online nih Phone in thimfungnak pek in thimfung tam bik a hmu mi paoh kaiter a si. Winner zong mizapi thimfung tampi a hmumi kha pek an si.

Tutan Myanmar Idol zuamnak ah Mark petu (Judge) hna cu Aung Ko Latt, Phyu Phyu Kyaw Thein le Tin Zar Maw hna an si.