Myanmar Idol Top 8 Ah Aa Telmi Lainu Nilen Par Mawi Vote Pek Khawh A Si Cang

0

City Hunter| 2018 June 29| Myanmar Idol Season 3 hlasak zuamnak i minung 10,000 tluk aa zuammi lakah a thiam bik minung 8 thimmi ah aa telmi Lainu Nilen Par Mawi cu June 28 zan ah TV Live in hla zuamnak a ngei than cang. Cucaah, June 28 zan suimilam 11:00 in tu zanlei (June 29) zanlei suimilam 6:00 tiang vote pek khawh a si than cang. Ooredoo simcard in amah vote pek a duhmi paoh nih 7777 ah 3 tiah tialpiak in vote pek khawh a si.

Myanmar Idol Season 3 ahhin minung 10,000 tluk an i zuam. Cu minung 10,000 cu zankhat hnu zankhat in an tla lengmang i cu chung in Lainu Ni Len Par Mawi cu a thiam bik minung 8 tiang aa tel hi a si.

Kan hnu zarh ahkhan top 10 chung in zuamnak an ngei i minung pahnih an tlak caah tu zarh cu minung 8 lawng an taang cang. Cu chung ah Lainu Ni Len Par Mawi aa tel hi a si. June 28 zan ahkhan hlasak zuamnak an ngei cang. Cu hlasak zuamnak result cu tuzan (June 29) ah an thanh lai. Hlasaknak lawng si lo in mizapi vote peknak hi a biapi tuk.

“Kan hnu zarh ah khan minung 10 kan i zuam i cu chung in pahnih a tla. Hmaizarh zongah zuamnak a um than lai caah bottom down dirhmun phak ahcun mark petu nih thimmi dirhmun phak khawh hi a har taktak. Cucaah Chinmi nih cu hlan nan ka dirpi bantuk in a tangrih mi zongah nan ka dirpi rih ding a biapi tuk. Kan herh taktak hna. Kan bochan ko hna” tiah Ni Len Par Mawi nih mizapi sinah biacahnak a ngeih.

Myanmar Idol hi Ooredoo company nih sponsor a pekmi a si caah Ooredoo Simcard aa tlaihmi nih duhzat paoh vote pek khawh a si. Zahan aa zuammi 10 chungah mizapi leikap in vote tlawmbik a hmumi 3 cu bottom down ah chiah an si i cu chung in pakhat kha mark petu nih an kaiter. Pahnih cu zuamnak ah tel khawh tiloin chuah an si.
Myanmar Idol zuamnak cu Cawnni li zan lengmang tuah a si i Live in zuamnak an dih le cangka in cawn ninga zanlei 6:00 tiang mizapi nih vote pek khawh a si.

Mizapi nih thazaang kan pekmi hna vote ning cu Myanmar Idol application kha download tuah in vote khawh a si. Download kan tuahmi application pakhat in minung pathum tiang vote khawh a si.

Cun Ooredoo SIM Card in vote khawh a si. Oredoo SIM Card a hmangmi nih 7777 ah khan voting number na duhmi te khan a tial lai i na kuat lai. SIM Card pakhat in an duh zat paoh vote khawh a si. Ooredoo simcard hmang in Nilen Par Mawi vote pek na duh ahcun 7777 ah 3 tiah na tialpiak lai. Number 3 hi Nilen Par Mawi vote number a si.

Ni Len Par Mawi hringtu a pa Pu Hrang Vung nih, “Ramchung ramleng Chinmi zapi nih thlacamnak in siseh, vote peknak in siseh tha nan peknak thawng in nihin tiang kan fanu Ni Len Par Mawi cu top 8 tiang a phan kho cang. Hlasak hi cu an thiam ciocio ko hna, mizapi vote peknak hi teinak hmuhnak ding ah a biapi tuk hringhran. Voikhat te tangka fangkul sawmthum nan dihheumi nih Myanmar Idol winner tiang nan phakter khawh. Cucaah, Myanmar Idol ah Chinmi nih winner kan hmuh khawh nakhnga thlacamnak in siseh, ooredoo vote peknak in siseh a dongh tiang thazaang nan kan chuahpi in nan kan tanpi rih naklai bawmhchanh kan herh ko” tiah The Chinland Post ah a chim.

Ni Len Par Mawi a tapa zong hi Nicolas Dawt Kam Sang zong Eain Meet Soneya Season-9 hlasak zuamnak ah pahnihnak a rak hmu balmi a si.

Ngaknu Nilen Par Mawi cu Engineering of Electronic Communication (EC) in Yangon ah sianginn a dih mi a si i Make Me Beautiful timi tamhmoih lei zuamnak zongah Myanmar Ram Pumpi huap in aa zuam i a thiambik pathum thimmi tiang aa telmi a si.

Amah hi kum 23 a si i Senthang peng Dongva khuami Pu Hrang Vung le Pi Thluai Iang @Thote nih an ngeihmi fanu hniang bik a si.
Nilen Par Mawi hi Eain Mat Sone Ya ah top 3 i a rak i telmi Nicholas Dawt Kam Sang far nu a si. Hi bantuk in fim cawnnak lei zongah sii-inn zungmawi thiamnak lei in siseh hlasaknak lei zong in siseh bochanmi a si i miphun dang hna lakah Chin miphun mithmai a kan ngeihtertu ngaknu pakhat a si. +++

About The Author

Na ruahning rak langhter ve.. (Leave a comment)

%d bloggers like this: