Myanmar Ram Ah Hngakchia Thahnawnnak A Karh Chin
The Chinland Post | 2023 June 29 — Myanmar ram ah kum tling lo hngakchia pawl fak pi in an nuhrin covo buarpiak an si rih ko tiah 2023 June 27 ah UN General Secretary report ah an langhter.
Myanmar ram hngakchia pawl hi 2021 nak in 2022 ah an covo an buarpiak khun an tong tiah an ṭial.
Cu bantuk nuhrin covo buarnak cu SAC ralkap nih a tam bik an buar i adang tlangcung hriamtlai pawl zong an i tel ve tiah cathanh chung ah an langhter.
2022 ah hngakchia thahnawnak le hliamhma tuarnak thil sinning (case) 512 a cang i cu chung ah SAC lei nih voi 377 an buar tiah theih a si.
PDF pawl nih an buar mi voi 9 le adang 130 leng hi cu zei bantuk minung asilole phu nih dah an buar ti theih khawh a si rih lo tiah an thanh.
Sianginn le sizung kahdohnak voi 105 a um i SAC lei nih voi 66, PDF lei nih voi 12 an tuah tiah an langhter fawn.
2022 ah SAC nih hngakchia ralkap 112, BGF nih 35, KIA nih 49 le PDF nih 18 an khawmh hna i ralkap an ṭuanter hna tiah an langhter fawn.
SAC nih hngakchia, bawmhnak petu phu telh in mipi pawl a doh hramhram hna caah thinphang a si tiah UN General Secretary nih a chim.
Tlaih a tong mi hngakchia pawl thlah ding le SAC telh in hriamtlai phu vialte nih hngakchia covo upatnak pek piak ding in cathanh chung ah an langhter.
About The Author
