Myanmar ram ah raltuk lioah buarmi sualnak (War Crime) thilsinning Facebook Company nih IIMM a pek
The Chinland Post | 2022 September 13 – Myanmar ram ah raltuk lioah buarmi sualnak (War Crime) le miphun cithlohnak (Genocide) ruang i tazacuainak a bawm kho ding thilsinning (information) million tampi cu Facebook Company nih an kan pek tiah Independence Investigative Mechanism for Myanmar (IIMM) nih September 12 ah a chim.
A sinning tak a langhter lomi Facebook account deu in thlahmi thilsinning (Evidence) million tampi an kan pek tiah IIMM rianngeitu Nicholas Koumjian nih Switzerland ram Geneva khua UNHRC Conference ah ah chim. Cu facebook account deu pawl cu Facebook nih a phih dih ṭhan hna.
IIMM cu 2018 ah UNHRC nih a dirhmi a si i, rampi level le vawlei pumpi level in biaceih zung phuan ding ah hlathlainak tuahmi an si.
Internet cung in huatnak bia pawl an thlah tiah UN nuhrin covo phu nih 2018 ah an rak chim. Facebook zong nih cu bantuk pawl cu a rak phih tiah a chim.
2017 Rakhine ram chungah Kawl ralkap nih hmunhma zohfelnak an rak tuah lio ah Rohingya miphun sing 7 leng Bangladesh ram ah an rak zaam i ICJ nih Myanmar ram cu miphun cihlohnak (Genocide) in taza an rak cuai.
Kawl ralkap nih Rohingya miphun cungah nuhrin covo ka buar lo tiah a rak al i Rakhine ram chung i misual phu pawl phungning tein ka doh hna a si tiah a leh.
About The Author
