Myanmar Ram Mipi Tam Deuh Cu Lungthin Zawtnak Ruang Ah Nunnak Caah Thinphan A Si
Salai Mangpau | August 24, 2023 — Myanmar ram mipi tam deuh cu lungthin zawtnak an ngei ruang ah an nunnak ca tiang thinphang a si ko tiah lungthin lei Siibawi Australia ram Central Queensland siizung in Dr. Thet The nih ralring peknak bia a chim. Lungthin zawtnak a ngei mi hna an zawtnak hramthawk ahcun, lungthin, taksa-pum lei, an cawlcangh ning tiah phun 3 ṭhen a si. Mah phun 3 chung ah ṭihnung bik mi le minung nunnak caah thinphan a si bik mi cu thinhun in kutthlak (Anger Outburst) le zaan hngilh kho lo/ ih khawh lo (sleeplessness) hna an si.
Lung zornak le lungthin lei pehtlai in zawtnak (Mental Symptoms) zawtnak a langh ning phun a tam tuk. Mah chung in zawtnak a tambik mi cu thinphannak, lungretheihnak, thintawinak, lungthin nuamh lo nak, lungthin zornak, a caan ah ngaihchia ngai in um, thinphannak, ningṭih thinphangpengnak, thilpakhatkhat zoh khawh ( focus/concentration) lo nak, caan sau thilcingken tilonak (midang le thil min cingkhen kho ti lo) lungtlau le thintawi in aukhuannak hna aa tel.
Mah zawtnak a langh ning hi pakhat hnu pakhat pehzulh peng ahcun a hnu ah minung tlamtling ti lo mi (Mihrut) dirhmun tiang a phan kho mi a si. Tahchunhnak – Harnak ton caan le thinphang in tlikzaam caan ah pawcawnnak a har, rian ngeih lo, fa le kong, innlo kong le hmailei khuakhan lai relnak kong ah chungpit vansang in a um mi hna khuafak tuk ruah/pehzulh in ruah peng ahcun lungzor zawtnak hi ngeih colh a si ko.
Cun, lungzornak in minung pumsa ah a langh ning cu (Physical Symptoms) hi minung pumsa ah a lang ve. Mah cu hmur dangcar in um, lufah, lungmit, a caan ah thlanhri put in um, pawfah bantuk in chungfer lengmang, kut/ke a zeng in um, thawchuah a rang, zaan hngilh khawh lo, thinhung mi langhter-holh tha lo chim le kut ke thlak tiang in um a si. A bik in zaan hngilh/ih khawh lo in um, thinhung in kut/ke thlak tik ah mah nunnak le inn chungkhar tiang harnak a phan kho mi a si. Tahchunhnak- America ram ah a tam bik mi cu meithal in a um sawh mi hna hei kah, motor rang tuk in mawngh/mi hei pahhnawh (Road Rage) thilri den/khuai, hawikom he i sik/ velhnak tiang a phan kho mi a si.
Cherhchan : VOA nih Australia ram Central Queensland siizung Lungthin lei Dr. Thet Hte biahalnak lehmi a si.
About The Author
