Myanmar Ram Thla 6 Chung Ah Voi 800 Leng Kanghnak a Chuak, Minung 54 An Thi
The Chinland Post | 2023 August 7 — A luancia June thla, Myanmar ramchung ah kanghnak voi 67 a chuak i January thla in June thla tiang ah voi 800 leng mei a kaang tiah SAC kuttang Meithat zung nih thawng an thanh.
June thla chung ah coka mei ruang ah voi 24, amah tein a cang sual mi le Electric mei ruang ah voi 30 a kangh ruang ah inn le thil chiahnak ruuk 100 leng a kaang tiah an langhter.
Minung 3 an thi i 10 an i hliam bantuk in sing 2,000 leng man an sung tiah an ṭial.
2023 January thla in June thla tiang thla 6 chung ah Myanmar ramchung ah coka rawl chuannak in voi 153, mei daithlan ruang ah voi 266, amah tein a kaang mi 20, Electric mei ruang ah voi 272, ram mei ruang ah voi 94 le ṭek ruang ah voi 4 a kaang tiah cazin ah an langhter.
Cu chung ah miṭhalo hna nih voi 63 le buainak a chuahpi mi nih voi 70 an khangh tiah a langhter i miṭhalo hna nih khangh mi tiah a langhter mi hi innkangh cansualnak pawl khi a chim duh mi a si lai i buainak a chuahtertu pawl tiah a langhter mi hi SAC ralkap pawl nih an khangh mi kha dothlennak phu pawl nih an khangh mi bantuk in cazin a langhter mi a si.
Cu bantuk mei kanghnak ruang ah innlo 2,482 a rawk i minung 54 an thi, 123 an i hliam bantuk in tangka sing 13,669 man leng an sung.
Atu langhter mi cazin hi innkangh cansualnak pawl a si i SAC ralkap nih an khangh hramhram mi pawl hi an langhter mi cazin nak in a let in a tam lai.
Myanmar ramchung ah SAC ralkap nih July thla chung ah voi 85 leng mipi inn a khangh i ramṭhen le peng 5 ah mipi inn 1,750 leng a rawk tiah NUG nih a langhter.
About The Author
