Paletwa Peng Laymyo Elecetric Mei 600 Megawatt Cu France Ram Nih Riantuan An Thok Cang Lai
Salai Elvis| 2019 July 22| Chin ramkulh chungah a ngan bikmi mei tha chuahnak ding Paletwa peng, Laymyo tiva (dam) Electric mei 600 Mgwatt laknak rian cu France ram Company pakhat nih riantuan an thok cang lai tiah kan theih.
Atu lio ah hlathlainak (survey) an tuah lio i avoi khatnak ah US $ 2 Billion dih in le avoi hnihnak 7 Billion dih in an tuah lai” tiah sipin vuanci U Soe Htet nih a chim.
Paletwa peng Tan-thaung khua pawng ah dil ding Laymyo mei laknak cu Kawlram chung mei laknak a ngan bik chang a si i mei tha 662 Mgwatt tluk a chuak kho ding a si bantuk in riantuan dingin a pakhatnak bik papek mi zong a si. Cun a pahnihnak riantuan ding papek a simi Laymyo tiva pi thiam a si i mei tha 105 Mgwatt chuak kho ding Rakhine ram in lak than ding zong timhtuahnak ngeih a si rih tiah kan theih.
“Hi tiva ah mei an lak a si cun Laymyo tiva kam a ummi khuate pawl thialkamter an hauh lainak kongah lungrethei ngai in an um. Cun hi rian an tuannak thawngin a pakhatnak ah pawngkam thilri a rawk lai, pahnihnak ah khuami pum pawcawmnak caah harnak an tong lai” tiah Chinram pawngkam zohkhanhnak kong tuanvo ngeitu pakhat nih a chim.
2018 December 24 ni ah khuami minung 90 tluk nih tidil an timhnak hmun ah cun kal in “Laymyo tivapi cu zungzal hmun in luang camcin ko seh” timi catar i ken in an duh lonak an rak langhter bal.
Mah tiva (dam) an dil ruangah thil an ton lai ding tilianhnak, pum pawcawmnak kong, pawngkam rawhralnak a chuah lainak kong le hi rian cu tuan lo dingin khuami hna nih an khamnak kong Chin River Watch phu lutlai Saya Bo Lun nih a chim.
Laymyo tiva cu Matupi Bungtla tisor cu tihna a si i Paletwa le Rakhine ram tiang a vung luangmi tiva a si i hi riantuannak kongah avoi khatnak Tuluk cozah le avoi hnihnak ah a tubantuk in riantuan thok an timh hi a si.
(Ref:Democracytoday, Mizzima)
About The Author
