Party an system zoh thannak

Salai Tial Cung Lian| TCP-Hakha| August 7, 2020| Vawlei cungah minung hi a rak vakvai mi kan si. Minung pakhat in Chungkhar kan dirh. Chungkhar in Khua kan dirh. Khua in pengtlang kan dirh. Pengtlang nih miphun a dirh. Miphun pakhat sihnu cun a dang miphun he zong fonh le cawhkalh a hau ve cang. Mah caah Politics ah hramthlak in dir a hau caah Politics a thawknak a hrampi a si ti zongin an rak chim tawn.

Cucaah Politics tuahnak ah Party dirh an hau cang. Mibu in politics tuah ti a hau cang caah anmah le thiam ningin Politics cu an tuah cio cang. Asiah cun Political party system zoh ti tuah hna u si.

 

  • Independent or Nonpartisan system

Independent in a dirmi cu Official political party an si lo. Anmah tein a dirmi an si. Independent cu Miphun hme hna caah anmah miphun aiawhtu dingah Independent in an i zuam tawn. An miphun covo kha Hluttaw ah an chim rel tawn ve. Anmah tein an dir ko nain Political Party he a fonh than tawn.

 

  • One Party or Uni- party system

One party system cu an power a ngan. Anmah lawng nih nawlngeihnak an co caah an duh ningin ram an hruai. Positions party an um lo caah an duh ning paoh in an nung i ram an hrawk. Kawlram ah cun Ne Win le U Nuh te chan lio hrawn kha hmuh khawh a si. One party system a chiatnak bik cu minug pakhat duhning lawngin a si caah mipi hremnak zong a tampi.

 

  • Two Party system or Bi- party system

Ram pakhat ah Two party lawngin an um. USA ah hmuh khawh a si. One Right party le one left party tiah then an si. Policy a dang veve an ngei. Mipi nih an duhmi party pakhat kha an i thim. Party tampi a um lo caah party pakhat lawngah umnak nawl an ngei ti khawh a si. Kawlram zong Federal taktak hmu u si law, State level ah cun miphun party a um ko lai nain Union level ah cun Party pahnih lawng an um te lai ti khawh a si.

 

  • Multi-party system

Multi party timi cu Party tampi a um ti khawh a si. Atu kawlram nih kan hman mi Party system hi Multi-party system cu a si. Party tampi a um tikah Mipi nih duhmi party thim awk tampi a ngei. Party ngan deuh le Party hme deuh tiah an then. Party ngan deuh zong nih anmah lawngin cozah ser khawh lo a fawi te. Party hme zong nih anmah lawngin cozah an ser kho tawn lo. Party ngan deuhmi nih Balance thiam ngai a hau. 2015 lio NLD nih amah lawngin cozah a ser nain tlangcung miphun nih anmah miphun kaltak in miphun dang Party ah an luh dih caah a si. Multi-party system nih a tinh bikmi cu miphun hme hna zong nih anmah le miphun cio in dir ve kho hna seh ti a duhnak a si ve.

 

Cuca’h zei bantuk party hmanh an tha hlei i, an chia hlei dih ve lo. Mipi nih mah le sining hoih cio in Party ah mee pek awk a si ko. Miphun hme zong nih anmah miphun aiawh in Independent ah an dir zongah anmah miphun caah cun aa palhnak a um lo.

Na ruahning rak langhter ve.. (Leave a comment)

%d bloggers like this: