Pi Mang Tin Ci Sin In Thil Sining Fianternak Le A Lunglawmhnak

0

April 2 chun kan inn a kanghnak kong ah media cheukhat biafang hmanmi kan siarem lo tuk i fianternak kan hun tuah.

1. Kanmah hi Thantlang peng ramukbawi Pu Lal Luai tufa kan si. Kan pule hi Cinzah bawiphun an si. Hringtu kan pa Pu Len Kham hi kan dawt tuk. Ka pa hi 1999 December 24 ah a zeng. Hringtu ka nu a thih hnu ah ka rian vialte chuahtak in ka pa hi ka zohkhenh, ka congh. Cu lio ah keimah biachimmi cherhchan bak in Kawl media le Lai media cheukhat nih “putar” timi biafang a kan hmanpiak, a kan chimtermi le bia ka chim lomi pi keimah min hmang in thawngpang an tialmi cung ah kan lung a tha lo tuk i atu bantuk in thil sining kan hun fianter.

Kan inn a kaangmi kong he pehtlai in The Chinland Post le The Hakha Post dah ti lo Kawl media siseh, Lai media siseh, zei bantuk media sin hmanh ah bia ka chim lo. Cucaah, media tampi nih an sin ah ka chim lomi bia kha lihhrokhrol in an thawngthanhmi ah an tial cio. Cun, “Putar” timi biafang ka hman lomi a kan chimter. Hihi a dik lo bak lomi a si. The Chinland Post le The Hakha Post media lawng nih bia a kan hal. Cu lio zong ah inn hi zeitindah a kangh timi hi ka hngal bak lo ti hi ka chim khawh a si. Ka lau tuk, ka lung caw i bia ka chim kho lo. Cucaah, ka pa Pu Len Kham hi kan dawt tukmi a si, putar ti kan siang lo. Zei bantuk media nan si ah atu thawk in putar tiah hmanpiak ti lo ding le media dang zong ah zei bia hmanh ka chim ti lomi thil sining dik ka rak in fianh hna.

2. Innkangh, ngaihchiatnak kan tuarmi he pehtlai in a kan dirkamhtu, a kan bawmchantu, a kan hnemtu innpa chakthlang, sangmi le khuami, meiphelh zung riantuantu, khuabawi, Khrihfabu, chungkhar rualchan le tuanvo ngeitu cozah… nan dihlak cung ah kan i lawm tuk. Ramchung ramleng in thazaang a kan petu, a kan hnemtu zapi cung ah kan i lawmhnak kong The Chinland Post sin in kan rak langhter.

A cunglei thil sining kan rak langhtermi le kan fiantermi hi atu khua kan saknak Pyidawtha sang Pu Khin Maung Win inn, April 5, suimilam 11:00 tluk ah The Chinland Post riantuantu kan nau pakhat he biaruahnak kan ngei. Cu kan i ruahmi le thil sining dik cu anmah The Chinland Post media sin in kan hun fianter hi a si.

Catialtu:
Pi Mang Tin Ci
2018 April 5

Biakilh: A cunglei cabia hi thawngpang a si lo, thil sining fianternak a si. 

About The Author

Na ruahning rak langhter ve.. (Leave a comment)

%d bloggers like this: