Pi Suu Kyi Nih Rakhine Ramkulh I Rohinya Buainak Kong Chimfiannak A Tuah

TCP-Online| 2018 March 19| Australia ram ah tuahmi Australia-Asian meeting pi ah ramkomh ruahnak petu Pi Suu Kyi nih Rakhine ramkulh ah a buai cuahmahmi Rohinya kong chimfiannak a tuah.

“Cozah thar nih Kawlram ramkomh pi cu thla 18 kaa hruai hnu hin buainak tampi kan ton. Nikum UN ah kan rak chim cang bang Rakhine ramkulh chung a ummi minung pawl humhimte le daite in an um khawh nakhnga, vawleicung ram hna zong nih cithlatnak tha tein an tuah khawh nakhnga le buainak hi a dih zok nakhnga biatak tein kan tawlrel ko lai. September 25 hlan khan cun Rakhine ram ah hin buainak a rak um lo. Tu ahcun ram chuahtak in Bangladesh ram ah ralzaam in minung tampi an kal. Cuve bang in ram a chuah tak lomi zong tampi an um ve. Hiti a chuahtakmi hna hi zeiruangah ram a chuahtak hna hnga timi a ruang zong theih ka duh ve. A zei si zongah vawleicung pi nih nan kan bawmh lai i hmun khat ah Rakhine ram a buaimi hi kan tawlrelti hna lai.”

Pi Suu Kyi nih tubantuk in Australia-Asian meeting pi ah Rakhine ram buainak kong a chimmi cu Australia Prime Minister Moalcolm Turnbull nih thawnglatu hna sinah Pi Suu Kyi nih Rohinya buainak kong a chimmi hi a chimh chin hna.

Malaysia Prime Minister Najib Razak nih cun, Rohinya buainak hi Kawlram chung pi buainak a si lo i, Rakhine ramkulh chung i humhimnak lei kong ah a buaimi a si tiah a chim.

Singapore Prime Minister Lee Hsein Loong zong nih, Kawlram chung Rakhine ramkulh buainak hi Asian ram kan lungre a thei ko nain Kawlram cozah sin zeihmanh bia ka chim lai lo, tiah a chim ve.

Ref:RFA

Na ruahning rak langhter ve.. (Leave a comment)

%d bloggers like this: