May 24, 2024

President Thimning Cuanhnak; President Caah Henry Van Thio Maw U Win Myint Dah?

0

Salai Holy Tawk Tling Thang | 2018 March 21| Atu lio Myanmar ramkomh President a tuan liomi U Htin Kyaw le Pyithu hluttaw Speaker U Win Myint nih 2018 March 21 ah an rian an dinhtak veve mi thawngpang nih khuaza ramkip a hun hninh. Cu ruang ah Myanmar ramkomh President thar cu 2008 phunghrampi pohmah 73 ning in thimnak an tuah colh lai. Hluttaw Speaker U Win Myint hi ramkomh hluttaw nih Vice President caah an chuahpi lai tiah an zumh cio. Phunghrampi nih atu lio Vice President Henry Van Thio hi President tlin khawhnak ding lam a onh maw? Phunghrampi ning in Myanmar ram President thimning cang le ahodah President a tling kho timi a dotdot in zohti hna usih.

a. Ahodah Caankarlak President A Tuan Lai?
2008 phunghrampi pohmah 73 (a)nak ah rampi President cu a term a dih hlan i rian aa phuah ah siseh, a thih ruang ah siseh, zungzal in a tuan khawh ti lo ruang ah siseh, a kong pakhat khat ruang ah siseh President rian (thutdan) a lawn ahcun Vice President minung pahnih lakah thimnak tuah lio i meefung tamdeuh a ngahmi nihkhan caankarlak President a tuan lai tiah aa tial. Cucaah, caankarlak President cu Vice President U Myint Swe nih a tuanchih chung lai.

b. President Cu Ni 7 Ah Maw Ni 21 Chung Ah Dah An Thim Lai?
2008 Phunghrampi pohmah 73 (b)nak ah rampi President rian (thutdan) a lawn caan hi ramkomh hluttaw tonpumhnak tuah lio a si ahcun a lawngmi President rian ni 7 chung i tlamtlinh khawhnak caah caankarlak President nih ramkomh hluttaw lutlai sin ah rianrangte in thawng a thanh lai tiah aa tial. Pohmah 73 (e)nak ahcun ramkomh hluttaw tonpumhnak tuah lio a si lo ahcun ni 21 chung ah hluttaw meeting a auh lai i President thimnak a tuah lai tiah aa tial. Atu hi Amyotha hluttaw he Pyithu hluttaw meeting an tuah liopi a si ko caah President thimnak cu ni 7 chung ah an tuah lai tiah fehter khawh a si.

c. Hluttaw Nih Vice President An Thim Than Lai
Caankarlak President nih ramkomh hluttaw sin ah President thimnak ding cakuatmi a hmuh cangka in ramkomh hluttaw nih Vice President caah minung pakhat an thim lai tiah 2008 phunghrampi pohmah 73 (c)nak ah aa tial. Cucaah, President U Htin Kyaw thutdan a lawngmi caah ramkomh hluttaw nih minung pakhat an thim lai. Cu an thimmi cu dengteo (direct) in Myanmar ramkomh President a si colh rih lai lo.

d. Hluttaw Nih Ahodah Vice President Caah Min An Chuahpi Lai?
Phunghrampi ning in ramkomh hluttaw nih a lawngmi President thutdan thimnak caah minung pakhat min cazin an chuahpi lai. Cu an chuahpimi cu President a si rih lai lo, Vice President lawng a si rih lai. Ramkomh hluttaw nih ahodah min cazin an chuahpi lai? Ramkomh hluttaw nihhin President tuan khawhnak ding tahfung a tlinhmi aho paoh an thim khawh. MP chung theng in a hau lo, MP a si lomi zong Vice President caah min cazin an chuahpi khawh.

U Win Myint le Daw Aung San Suu Kyi

Atu lio Myanmar ramkhel thlihran umtuning zohtikah an zumh bikmi hna cu; Pyithu hluttaw Speak U Win Myint, Thura Shwe Mann, Tin Myo Win le Yangon ramthen Chief Minister U Phyo Min Thein hi an si. President U Htin Kyaw nih a rian a chuahtak ni thengte i a rian a dinhtak vemi U Win Myint hi Vice President caah an chuahpi lai tiah mi tam u nih an zumh bik. Catialtu keimah zong nih atu lio Pyithu hluttaw Speaker U Win Myint hi Vice President caah ramkomh hluttaw nih an chuahpi hrimhrim lai tiah ka zumh ve. Asinain rmkomh hluttaw nih U Win Myint an chuahpi in an fehter zong ah dengteo in President a si kho rih lo.

e. Vice President Henry Van Thio Zong President A Si Kho Ve
Myanmar rampi President cu atu lio Vice President Henry Van Thio zong a si kho ve. Henry Van Thio a si khawhnak ding 2008 phunghrampi nih lamkaupi in a onh. Cu bantuk in Vice President U Myint Swe zong a si kho ve. 2008 phunghrampi upadi nih President si khawhnak lam kaupi a onh hna. Myanmar rampi cu NLD cozah a si caah U Myint Swe nakin Henry Van Thio caah president tlin khawhnak a lam a kau deuh, lam a phei deuh. Cucu, 2008 phunghrampi upadi pohmah 73 (c le d)nak ah fiangte in hmuh khawh a si. Annih pahnih cu President tlin khawhnak ding tahfung a tlinhcia cangmi zong an si fawn.

NLD party le Suu Kyi policy fiangte in hngalh khawh a si lo caah an duh ahcun Henry Van Thio zong fawite in President an tlinter khawh ko. An tlinter hrimhrim lai lo tiah ahodah zakhat ah zakhat in a chim cia chung kho lai? Vice President caah hluttaw speaker U Win Myint hi ramkomh hluttaw ah chuahpi in NLD palai Henry Van Thio tu hi President ah an tlinter khawh.

Phundang in chim ahcun Suu Kyi nih U Win Myint hi passing chantu ah hmang in Henry Van Thio hi kawl suttu ah a hman khawh ko. Cun a duh si le U Win Myint zong hi kawl suttu ah a hman khawh ve thiam fawn. U Win Myint hi President si khawhnak tahfung a tlinh lai maw timi zong ruahchih a hau fawn. Procedure ning in kan chim ahcun U Win Myint nakin Henry Van Thio caah a lam zong a naih deuh i thil umtuning zong a si deuh fawn. Suu Kyi meithal kuanpi taktak hi U Win Myint si lo in Henry Van Thio zong a si kho ko.

f. President Thimning Le Fehterning
Vice President caah min cazin chuahpimi kha President thimtu bu nih tahfung a tlinh le tlinh lo an chekfel lai. A tlin ahcun cu chuahpimi min cazin cu ramkomh hluttaw nih an fehter lai. Cu fehtermi Vice President le atu lio Vice President a tuan liomi Henry Van Thio le U Myint Swe kha hluttaw nih meefung thlaknak in an thim than nolh hna lai. Meefung tambik a hmutu nih Myanmar rampi President thutdan cu an co lai.

g. NLD Le Suu Kyi Nih A Fekmi Policy Ngeih A Herh
Vice President pathum chung in President thimnak a phak tikah Rampi ruahnak petu Daw Aung San Suu Kyi le NLD party nih a fekmi policy an ngeih lio sual ahcun a hlat in zu a chuak an ti bang ralkap palai Vice President U Myint Shwe kha president tlinter sual a fawite. Cucaah, ramkomh hluttaw ah mee aa thekvarh dih nakhnga lo a fekmi policy an ngeih a herh. Daw Aung San Suu Kyi le NLD party nih a fekmi policy an ngei lai ti zong ka zumh fawn. Chuahter an duhmi le an timhmi te kha a chuak ko lai.

h. U Win Myint
U Win Myint nih a rian a chuahtak caah amah hi President a tlinnak ding lam kau bik a ngei. 2015 thimnak ah thimnak aa cuh i MP a tlingmi le Suu Kyi tawlrelnak in Pyithu hluttaw Speaker thutdan tiang pekmi a si. Amah hi Daw Aung San Suu Kyi nih a bochanmi le a zumh taktakmi a si. NLD central committee (CEC) upa le NLD central committee Secretary chungtel pakhat zong a si chih.

Chin MP pakhat nih, “Pyithu hluttaw Speaker U Win Myint tluk in rian a tuan khomi le amakmi hi hluttaw ah an um ti lai lo. Amah hi rampi President caah chuahpi ngam tlak taktak le a tuan kho dingmi zong a si tiah ramkomh hluttaw palai tampi nih kan zumh i kan bochan. Hluttaw hrimhrim ahcun bochan tlak taktak a si. Amah hluttaw i a um ti lo dingmi tu hi kan thin a phang deuh” tiah The Chinland Post ah a chim.

Myanmar ramkheltu upa cheukhat le MP hna zong nih President U Htin Kyaw nakin U Win Myint hi rian a tuan kho deuh lai, a ning zong a hngal, a thekvak zong a tha, dinfelnak a tanh bakmi pa raltha taktak a si tiah an ti.

Cucaah, Vice President Henry Van Thio nakin U Win Myint hi President a tling lai tiah ka zumh deuh. Zeiruang ah ti ahcun Vice President-2 rian vialte a thar in va i pekchanh (incharge) ding khi rian hnahnawk ngai ding pakhat a si. Cun, Kawlte nihcun rampi President rian taktak hi cu Tlangcungmi (Chin) miphun pek an kan duh lai ka zum lem lo. Cu ruang ah Myanmar President thar cu U Win Myint a si cang ti tluk in ka ruah cang.

NLD party le Suu Kyi mitbenh in ka cuanh tikah a ra laimi Myanmar ram President cu Henry Van Thio asilole U Win Myint ah pakhat chingchang an si hrimhrim ko lai tiah ka zumh. Nangtah ahodah Myanmar President a chuak lai tiah na zumh ve? Zu bang a hlat hna nin a chuak ve te sual hnga maw? Myanmar rammi zapi cung dah dawtnak le zawnruahnak a ngei i bochan tlak le zumhawktlakmi President tha chuak hraam ko seh.

Ref: 2008 Constitution, President Office

About The Author

Na ruahning rak langhter ve.. (Leave a comment)

%d bloggers like this: