President U Htin Kyaw Zaka Cu Aho Nih Dah Airawlh Lai?
Salai Elvis Lian Bawitlung| 2018 March 21| Kan Kawlram President U Htin Kyaw cu a ngandam lo ruangah a rian in aa din kho, si nain a mah zaka ah NLD chung thiam in a airawl kho tu an um tiah NLD zungpi biachimnak nawlngeimi pakhat nih a rak chim bal cang.
Ataktak ah Myanmar ramkomh President U Htin Kyaw nih atu a tlaihmi a rian in dinh a duh ruang ah 2018 March 21 thawk in President rian in aa phuak cang tiah rampi President zung nih March 21 ah an thanh. Myanmar ramkomh phungphrampi pohmah 73 (b) he aa tlakning in a lawngmi President rian (post) cu ni 7 chung ah midang a thar rian pek khawhnak ding kan tawlrel lai tiah an thanh chih.
NLD cung lei upathiam nih a rak chim mi cu “U Htin Kyaw cu a ngandam lo tiah theih cio dih a si. Cu caah a mah zaka ah mizei dah thim awk a si timi zong rak ruah chung a si, keimah pumpak zong ka ruat ngaite. Asinain NLD party chung ah hin minung cu an um ko, cucaah President a si khawhnak ding ahcun zeilei paoh ah a tlamtlin cu a hau ve i kei mah zong nih ka chim lai, midang zong nih anruah ngai mi U Swe Man hi President si awk ah aa tlak hrim lo. Cucaah cun a tu President rian a chawng ding cu kan pi Daw Aung San Suu Gyi tlangtlak nak in thim a si te ko lai” tiah cunglei upa nih February thla ah khan a rak chim bal.
U Htin Kyaw cu 2017 kum lio ah Thailand ram ah (u-phiat-touh) zawhnak in Operation aa tuah tiah thawngpang cu a rak thang ngai bantuk in a zawt lio hmanthlak cu heih! tiah Media kip nih rak phozarh cio a si. 2018 Janaury 23 in 28 tiang Singapore ah a zawtnak cu a vai i zohfel ter than hna. Si nain khuaruah har pakhat a si mi cu Singapore ah aa thlop rih timi cu rampi thawngthanh ca lawng nih a rak tial nain a hmanthlak a rak langhter ti lo.
Rampi cozah nih U Htin Kyaw a ngandam lo nak kong cu phungning in thawngfian nak rak tuah hmanh hlah seh law ngandam nak lei le sii-ai aa thlop ning kong tu cu mizapi nih rak theih le hngalh a si fawn tikah a rian hi a pehzulh kho ti hnga maw timi ramkhel mit in hei cuanh ah cun biahal nak tampi, mizapi lei in a um theo cio lai.
“2008 kum upadi then 3 nak ah President le Vice President hna cu poh-mah (73)” ah President cu a caan tlin hlan ah aa dinh i aa phuah ahcun upadi ning in thim thannak nawl a um.
Upadi ningin President aa dinh ahcun Vice President I (U Myint Swe) nih caan karlak cu a mah zaka a rian a chawn chung ding a si. Cu tikah Phunghrampi pohmah 73(b) ah rampi President rian (thutdan) a lawn tikah ramkomh hluttaw meeting tuah lio a si ahcun a lawngmi President thutdan cu ni 7 chung i rian an pek khawhnak ding caah caankarlak (atu) President nih hluttaw lutlai sin ah a rannak in thawng a thanh lai tiah aa tial.
Cu i Caan karlak thawng an thanh hna bak in President ca cu Hluttaw lutlai nih a pakhatnak bik ah Vice President chung in a thim lai i Vice President pakhat a lawngmi zaka caah Ramkomh Hluttaw meeting a kai mi chung in thimnak a tuah colh ve lai. U Htin Kyaw zong Pyithu Hluttaw palai chung in Vice President in rak thim hmasa mi a si.
Cu caah a tu U Htin Kyaw a chuah cang caah Pyithu Hluttaw palai chung thiam in Vice President an thim awk a si. Cu dih in an thim thar mi pakhat le a tu lio Vice President I, II he minung pathum an si cang lai i an mah pathum chungah pakhat paoh kha ramkomh Hluttaw tonpumhnak chungah President cu an thim awk a si.
President U Htin Kyaw a ngandam lo nak kong le a tu a rian in a chuahtak taktak nak kong thawngpang vun theih cio tikah, a ho nih dah a rian cu a chawn te lai timi ram khel lei upa hrim an tluak a tuai tamtuk cio hna lai. NLD party chung in minung pakhat nih a chawn lai timi zong an mah chung lila in an i ruah ve hoi. Cu caah Daw Aung San Suu Kyi zong nih President caah cun a fimthiam ngaimi le a za bak mi a thim thiam a herh fawn.
2015 NLD party nih teinak an vun hmuh bak in President caah mizeidah an thim te lai timi cu ramchung/leng nih ngiatthlai cio a si bantuk in an mah caan chung lila ah President a thar thim than a vun si tikah hin 2015 lio nak hmanh in mizapi nih an ngiat thlai deuh theu lai tiah ka ruah.
NLD party chung in President ah a tling kho dingmi hna cu Pyithu Hlttaw Chiarman U Win Myint, Rampi remdaihnak Committee Chiarman Dr. Tin Min Win, Naypyitaw Council Chairman Dr. Myo Aung le Mandanlay ramthen Chief Minister Dr. Zaw Myint Maw hi an si.
“Ngandamnak lei, a thekvak zong a tha i ramkhel lei zongah a zabak tiah ka ruah mi cu U Win Myint hi a si. A ngan zong a dam, Hluttaw zong ah Chairman pakhat a si pin ah Suu Kyi zong nih a zumh tuk mi a si’ tiah NLD party zungpi lei in minung pakhat nih a rak chim bal. Asi nain hi chungah ramkhel lei upate hna nih an rak zumh ngai mi U Win Myint lila zong 2018 March 21 Pyithu Hlttaw Chaarman a rian in aa din cang tiah Hluttaw Vice Chairman U Ti Khun Myat nih a chim. Cutik ah President caah zumhtuk mi aa phuah ve hoi ah cun tiah mizapi le ramkhel lei upa thiam sang hna lung a buai chinchin cang lai.
U Shwe Mann le U Myint Swe: NLD party Bahu rianngei tu nih U Shwe Mann hi cu President caah aa tlak lo tiah ti ko hmanh hna seh law a si khawhnak lam a um ve. Rampi huap in tonbiaruahnak puai paoh ah U Shwe Mann cu Suu Kyi pawng ah a thudir peng ve mi a si. Cu bantuk in rampi vuanci pawl thimnak chung zongah aa tel peng ve mi a si fawn. Cun Suu Kyi le ralbawi hlun Tann Shwe a ton ter kho tu zong U Shwe Mann a si. Cu pin ah ralkap i hruainak chungin thli, ti le adangdang lei bawi ngan ngai pathumnak ah rak i tel ve mi a si. Hluutaw ah a sangbik nawlngaihnak pakhat a si mi Upadi lei zohfel tu phu zongah Chairman a tuan. U Thein Sein chan lio zongah Pyithu Hlttaw Chairman a rak tuan mi a si tikah a rian le a nunzia in President thim khawh nak lam ah a dir ve mi a si.
Asinain Daw Suu nih U Shwe Mann hi President a thar ah a thim bak ahcun ralkap lei he an i pehtlaih ning a har ngaiding dir hmun a si tiah ramkhel lei thiamsang hna nih an ruah chungmi a si. Asinain a dang pakhat ah ralkap lei he zong pehtlaih ning a thatnak, remdaihnak lei zongah hmun khat tein kar hlan ti nak ding caah riantuan tu dingah hin a tu lio Vice President II U Myint Swe hi a tha bik lai timi biahalnak zong a um.
2008 phunhram ning in President nawlngeihnak cu a santuk caah Daw Suu nih NLD chung si lo in midang pi thim ding ahcun a si kho bak lo tiin ramkhel lei upa thiamsang hna tam u nih an ruah ngai mi le an ngiat thlai ngaimi a si.
Biakilh: Hi cabia cu The Chinland Post hmuhning le lungput in tialmi a si lo, catialtu pumpiak ruahning le hmuhning a si. Catialtu Salai Elvis Lian Bawitlung hi Thantlang peng Hriangkhan khuami a si. Thantlang khuapi chung ah khua a sami an si. Rev. Biak Awi le Pi Sun Zing fa a si. The Chinland Post ah a sining le a caan vialte a phum/pe dihtu pakhat a si. Atu hi The Chinland Post ah Senior Reporter le Thantlang TCP zung tuanvo ngeitu rian a tuan liomi a si. Media lei training phun tampi a kai cangmi zong a si.
Ref: Khit Thit Media Agency, 7 Day Daily News, DVB Burmese, Chin Digest Vol.2 No.2
About The Author
