President U Win Myint; Cozah Riantuantu Thlahlawh Zatuak 20% Kan Karh Hna Lai
City Hunter| 2018 April 17| Myanmar ram cozah riantuantu thlahlawh karh an si lai i cozah riantuantu umnak inn (quarter) zong sakpiak chap an si lai tiah Myanmar President U Win Myint nih April 17 ah a chim.
Thlenremhnak a khulnuarmi zung pawl felfai deuh in zoh le renghnak ah ramkomh cozah nih a chiahmi thanchonak policy cu zungkip nih papek a dotdot in an tuanchuah lai tiah President U Win Myint nih April 17, kumthar biarocah (new year- speech) ah a chim.
Cozah riantuantu pakhat i a niambik thlahlawh cu 120,000 in 138,000 tiang karhpiak an si lai i a sang bik thlahlawh cu ks. 500,000 in 550,000 tiang karhpiak an si ve lai. Cozah riantuantu nikhat nihlawh caah a tlawm bik ks. 48,000 in rikhiah a si caah hi nihlawh he aa tlak in cozah riantuantu (vuanthawk rian nakin a niam deuhmi) paoh zatuak 20% karhpiak an si lai i vuanthawk telhchih in vuanthawk in a cunglei cozah riantuantu paoh zatuak 10% thlahlawh karhpiak ding zong cozah bu nih an tuaktaan dih cang.
Hi bantuk kan tawlrelnak ahhin rammi hna nih a hrampi an herhmi eidin, fenhaih kong kha biapi ah chiah in kan tawlrel lai. Umnak inn ngeih lo ruang ah a sican ning paoh in khua a sami mizapi harnak pawl tuarpinak caah mizapi ca riantuantu le atu lio cozah riantuan chung ah quarter ngeih lo ruang i harnak tongmi an um bantuk in pension laak dih hnu ah umnak inn ngeih lo ruang i harnak a tongmi cozah riantuantu tampi an um. Cu ruang ah cozah bu nih cozah riantuantu pawl, pension an laak tikah anmah bingte (private) in inn an ngeih ding, taih-khaan an ngeih ding le limhang ngeite in khua an sak khawhnak caah quarter pawl hi papek in kan tawlrelpiak hna lai tiah President nihcun a chim.
“Atu cozah thar kut ah a luancia kumhnih chung cozah riantuantu hna caah ramthen, ramkulh kip ah cozah riantuantu umnak innkhaan (quarter) 4627 kan sakpiak cang hna. A taang rihmi kumthum ah innkhaan 7000 renglo cozah quarter sakpiak ding in timhtuah a si rih. A ralaimi kum ah innkhan zapi 10,000 renglo kan sak lai i cozah riantuantu caah thlafatin a-yit-ciah (voikhat pi ah man pek si lo in a thip thip man pek ding in) in zuarh an si lai”.
Rampi cozah nih atu bantuk tawlrelpiakmi ruang ah rampi thlenremhnak lamthluan ahhin cozah riantuantu hna zong nih tuanvo laaknak ngeih in an i teltum cio ding zong a chimchih. Cu pin ah riantuantu hna nun lamthluan a tluannak ding ah caantawi chung ca budget zong riantuantu hna caah sullam le hmual a ngeimi si ding zong a si khawh chung in tawlrelpiak kan i zuam lai.
Ramchung ah rian tampi hmuh khawhnak ding ah chawphumnak a tuahtu ding ramleng pawl kan sawm hna lai. Ramleng phan Myanmar rammi riantuantu hna runvennak, cozah hmuh khawhnak hna zong ramhnih hnatlaknak pawl hrambunh in fak deuh in kan tawlrel lai tiah biarocah ahcun a chimchih.
Ref: DVB Burmese, President Office
About The Author
