Pu Ang Cung Le World Paih Champion Rung Lian Ceu Cu Yangon In An Rak I Thawh Than Cang
City Hunter| 2018 February 9| World Paih Championship a dirhtu Pu Ang Cung le World Paih Champion a cotu Rung Lian Ceu cu tu zingka (February 9) suimilam 9:30 ah Yangon in an rak i thawh than cang.
Hi kong he pehtlai in World Paih Championship a dirhtu le haotu a simi Pu Ang Cung nih atu bantuk in The Chinland Post ah a chim.
“Atu zingka suimilam 9:30 ahkhan Yangon in Hakha lei panh in kan rak i thawh cang. Keimah a ka dongtu he Rung Lian Ceu a dongtu chungkhar he kan zapi minung 15 tluk kan si. Pu Stephen Ni Kio nih a kan hruai. Yangon-Hakha dengteo (direct) a chuakmi High Class motor in kan rak i thawh. Hakha Chin Miphun Ni hman le paih ruah bak ah a rak tlungmi Hrang Tin he tiah kan rak tlungti. Tukum paih laksawng caah World Paih Championship phu nih Hakha caah ks. 500,000 le Thantlang caah ks. 300,000 laksawng a kan kuat i keimah nih ka rak phorh.”
“Tukum cu paih ruah bak ah keimah he Rung Lian Ceu he Hrang Tin he kan rak tlung kho. Hiti ramchung ramleng Lai nunphung pakhat a simi hmunkhatte ah i paihti khawh ding hi World Paih Championship phu nih kan i tinh zungzalmi a si. Tukum cu Pathian lamhruai thawng in kan rak tlung kho taktak cang. Rung Lian Ceu tlaih le paih a duhmi le a ngamhmi paoh Lai lei zong rak i timlam cio hna seh” tiah Pu Ang Cung nih a biapeh ah achimchih.
Rung Lian Ceu te cu an lamtluan ahcun February 10 zingka ah Hakha an phan te lai tiah theih a si.
“Hiti paih ruah bak ah Hakha tlun kan timhnak a ruang bik cu World Paih Championship phu nih kan i tinhmi chunmang tlinter kan duh caah a si. Ramchung lei paih thiam le champion pawl kha US lei ah kan cah hna lai kan ti nain kan cah khawh hna lo caah kanmah tu kan rak tluntimhnak hi a si. Hakha, Chin Miphun Ni ah World Paih Championship a cotu Rung Lian Ceu a zuamcawh ngamtu paoh nih chuah hnawh le zuamcawh khawh a si lai. Zatlang paih hi cu amah nawl siseh, kaa pai lai a ti le ka thlauh lai lo, kaa pai lai lo a ti zong ah ka forh lai lo. Asinain zuamcawh tu cu aa pai hrimhrim ko lai” tiah a biapeh ah a chimchih.
Rung Lian Ceu cu Hakha peng, Chuncung khuami Pu Si Hmung le Pi Tum Zing fapa a si. Rung Lian Ceu hi 1994 July 3, Chuncung khua ah a chuak. Rung Lian Ceu hi puai sunglawi le nipi a simi ah voi 10 aa pai i voi 8 bual a co cang. Kum hnih peh in World Paih Championship voihnih a cotu zong a si. Chinmi chung ah Rung Lian Ceu tluk in Chin miphun ni sunglawi ah bual a comi an um rih lo tiah kan theih.
Pu Ang Cung hi World Paih Championship Phu a dirhtu a si. Amah a chuahkehnak hi Hakha Khuahlun a si. Lai nunphung le lentecelh tha a petu i a cawisangtu pakhat zong a si. World Paih Championship nih aa hmuitinhmi suttung pathum cu; Lai Pa thawng vialte nih Lai Paih in pawcawmnak khim tiang laksawng an hmuh khawhnak ding, ramchung ramleng hmunkhatte ah Lai Paih i hrawmti le i paihti ding, a pathumnak cu Lai Paih hi Sea-game tiang luhpi ding hi an si tiah kan theih.+++
Photo: Pu Ang Cung/Hrang Tin
About The Author
