Pu Stephen Ni Kio Cu CACC Triennial Meeting Ah Award An Pek
Elephant Logging in Bago Division
City Hunter| 2018 April 2| March 29-April 1 tiang Hakha peng, Nabual khua ah tuahmi CACC (Chin Association for Christian Communication) Triennial meeting ah CACC nih kumkhat voikhat a pek tawnmi CACC award cu Pu Stephen Ni Kio an pek tiah kan theih.
Hi kong he pehtlai in CACC Calei riantuannak Secretary Pastor Lai Cung nih atu bantuk in The Chinland Post ah a chim.
“Tutan kan meeting ah Pu Stephen Ni Kio cu CACC award kan pek. Laksawng cu Trophy le ks. 1,000,000 a si. Hi CACC award cu 2015 kum khan pek hram kan thawk. 2015 kum ah Sayagyi Dr. Bawi Hu, 2016 kum ah Pu Lian Uk, 2017 kum ah Rev. Dr. C. Duh Kam kan pek. Tukum kan pekmi Pu Stephen Ni Kio hi CACC award kan pekmi hna lakah a palinak a si. CACC award cu kumkhat ah minung pakhat lengmang lawng kan pek”.
“Tutan Pu Stephen Ni Kio award an peknak a ruang cu;
1. Lai paih hi vawlei ah si ti lo in Theng (donhhlei) cung ah paih ding a chuahpi hmasa biktu le a paihpi hmasa biktu a si ruang ah siseh,
2. Lai hla tharchuahtu (Conglaizawnh, Sarlaam tibantuk) a si ruang ah siseh,
3. Chin –Chin Dictionary a kan tuahpiaktu a si ruang ah siseh,
4. Lai Nunphung Cauk a kan ṭialpiaktu a si ruang ah siseh,
5. Kawlram pumpi Level in caholh kong ah “Miphun Calei Laksawng” (Amyotha Sape Suh) Laimi chung in a kan hmuhpiaktu a si ruang ah an si” tiah Pastor Lai Cung nihcun The Chinland Post ah a chimchih.
Hi award cu ramkhel riantuantu, Biaknak lei riantuantu, Chin zatlang i thithruainak (leadership) le caholh le nunphung lei a cawlcangtu hna chung in bochanmi le upat pek awk a tlak an timi kha CACC nih a pekmi hna hi an si tiah kan theih.
Laksawng hi Pu Stephen Ni Kio nih a um lo caah Pu Ram Mang nih a cohlanpiak tiah theih a si.
About The Author
