Rakhine Le Chin Ramchung Kahdohnak A Fakchin Sullai Tiin UN A Thin Phang
TCP-Thantlang| 2019 February 10| Raltuknak ruang ah Kawlram chung hmunkip ah inn le lo chuahtak in a zammi hna minung cazin zei zat sat dah an si chim khawh a si rih lo pin ah inn le lo chuahtak in ramleng lei zongah a zam mi an um kho rih tiah UN ralzam kongkau tawlreltu chung chimnak nawl ngeimi Andrej Mahecic nih a chim.
Chin le Rakhine ramkulh chung ah Kawl ralkap le AA i tuknak a fah chin lengmang pin ah ramchung le Kawlram he aa naihniam mi Bangladesh lei zongah a zam mi an um caah lungrethei ngai a si ko tiah UNHCR nih ninga ni ah cathanh a chuah.
Kawlram chung ralzam mi hna sin ah UNHCR nih bawmhchanhnak pekding in timhtuahnak ngeih cia a si cang ko nain ralzam dirhmun in minung zeizat dah an si timi theih khawh an si rih lo. Cun a luancia December thla lio te khan Rakhine ram chung ralzam an umnak hmunhma diktak theih khawh an har pin ah kan vehvat khawh hna lo caah bawmhding zat kan theih khawh lo nak cu a si” tiah a cunglei upa nih a chim.
Bangladesh ram lei ah ralzam dirhmun in a zammi aa chapthar mi hna zong um hmun pek ding le an eiding kong zong zohfelpiak dingin UNHCR nih Bangladesh ram cozah a nawl hna.
UN khuallian pakhat a si mi Hollywood lemcang Angelina Jolie zong a luancia zarh chungah Bangladesh ram Rohingya miphun ralzam hna a vehvat lio zong ah Bangladesh Prime Minister he an i ton lio ah Angelina Jolie nih lunglawmhnak bia zong tampi a chim tiah kan theih.
Ref: VOA
About The Author
