Ramkhel Buainak le Sifahnak Nih A Temtawnmi Kawlram Dirhmun Kong ah Chin Party Hruaitu Pathum Hna Ruahning
TCP: Ramkhel buainak nih a temtawn i mi ramdang nakin sifahnak ah hnu a tolhmi Kawlram dirhmun hi zeiruang bik ah dah a si tiah na ruah?
Pu Zo Zam, CNDP Chairman: Tulio uknak a tlaitu NLD cozah hi tuanvo laknak le langhfiannak an ngei lo. A herhning tluk in rian an tuan lo. Ralkap cozah tei khawhnak dingah hmunkhat te ah tlangcung ramkhel party le Democratic Alliance nih kan rak dohti tiah cun 2008 phunghram nih rampi thanchonak a pek lo leng ah a lam kip in hrawhhralnak lawng a pek caah a si. NLD nih thimnak lioah thimfung lemsoinak i an rak hman bik mi cu, 2008 phunghram remh ding timi a rak si. Sihmanhsehlaw teinak an hmuh i uknak an tlaih in nihin tiang kumkhat chungah 2008 phunghram remhnak kong a chim zong an chim ti lo. NLD Cozah nih tuanvo laknak le an rian tuanning langhfiannak a um lo caah USDP Cozahnak nun khuasaknak le ramkhelnak lei in hnu kan tolh deuh cang.
TCP: Asiahcun hi buainak hi Chin Miphun Ramkhel Party chairman dirhmun pakhat in zeitindah kan remhchuah khawhnak ding lam na ruahmi a um maw?
Pu Zo Zam: Zeihmanh a tuan kho lo i a tuanngam lomi Cozah cu zeitinhmanh in ka zum kho ti hna lo, ka bochan hna lo. Cu zong cu mizapi ca thatnak kha si ko.
TCP: Ramkhel buainak nih a temtawn i mi ramdang nak in sifahnak ah hnu a tolhmi Kawlram dirhmun hi zeiruangah dah a si tiah na ruah?
Pu Ngai Sak, CLD Chairman: A lenglang ramkhel buainak remhchuahnak ding lam kawlnak men in cun Kawlram buainak hi kan remh kho lai lo. A thawk tein a hram kan kawl a herh. Kawlram chung um miphun hna nih kan rak ngeihmi mah te khuakhan lairelnak kha kan ngei ti lo, kan hal hna mi cu an kan ngaihpiak in an kan zulh piak lo. Tlukruannak, mahte khuakhan lairelnak le federal uknak nawl kan ngeih ti lo caah ramkhel buainak a um. Cucu ramkhel buainak kha remkhel ning in lam kan kawl tikah hriamnam in an kan doh. Cucaah tlangcung miphun hna hi mah te khuakhan lairelnak le tlukruannak an kan pek i Kahdaihnak minsenthutnak tlamtling tein kan tuah khawh lawngah daihnak kan hmu kho lai ti hi a pakhatnak ah chim ka duh.
Nun khuasaknak ah sifah kan tuarmi hi ramkhel buainak he aa pehtlaimi an si. Ramchung kahnak kum 70 chung kan tuar tikah ramri le khuakiken ah thanchonak rian zalong tein tuan khawh a si lo lengah rampi kilvennak caah timi Ralkap hmanding tangka ah rampi tangka tamtuk a kal i rammi hna caah thanchonak rian tuannak a um ti lo. Cucaah Kawlram ah a dikmi Federal ramkomh kan ser khawh hlan chung cu ramchung raltuknak a dai lai lo i ramchung raltuknak a um chung cu thanchonak a um kho lai lo.
TCP: Asiahcun hi buainak hi Chin Miphun Ramkhel Party chairman dirhmun pakhat in zeitindah kan remhchuah khawhnak ding lam na ruahmi a um maw?
Pu Ngai Sak: Pakhatnak ah Ramkomh huap kahdaihnak ca minthutnak ah aa tel rih lomi hna hi kan sawm hna lai. Annih nih an halmi zonghi a herh taktak mi a si caah kan zulh hna awk a si. A rang tein Ramkomh Panglong Conference kan tuah lai i a dikmi Federal ramkomh kan ser lai. Cuticun ramchung kahnak a dih lai i ralkap hmanmi tangka zong a tum lai i thanchonak caah kan hman khawh lai. Ram a daih ahcun ramleng in tangka hramphun in riantuantu tampi an lut lai cuticun mizapi nih kan herhmi daihnak le thanchonak kan hmuh ko lai.
TCP: Nihin kan buainak ahhin Kawlram Ramkomh Cozah lutlai a simi NLD cozah an cawlcanghning cungah na hmuhning?
Pu Ngai Sak: Ka lung an tling lo. UDSP nih thanchonak caah lam a rak sialpiak ciami hna hmanh cheukhat cu an dir termi a um pah len. Cu lengah upadi nawlngeihnak le rammi humhimnak a zorchuk. Cutikah thanchonak rianah mi cheukhat cu an tangka hram an phum ngam ti lo. Thimnak hlan ah khan NLD an kai ahcun Chawlehthalnak lei cu fak piin a thangcho lai nain upadi nawlngeihnak a zor lai tiah ka rak phuan chung. Asinain tu ahcun a pahnih tein ruahning tluk a si ve ve ti lo. Hi hi nawlngeihnak chungah a ummi hna nih an tawlrel ning ah aa hngat tiah ka hmuh. Cun nihin NLD hruaitu hna hi anmah fimthiamnak chuah in rian tuan loin Rampi ruahnak petu Daw Aung San Suu Kyi nawlpek mi lawng thut buin an hngah caah ca si tiah ka hmuh.
TCP: Upadi nawlngeihnak a zor na timi zawn ahkhan tahchunhnak pakhat in na kan chim kho hnga maw?
Pu Ngai Sak: Thein Sein Cozah chan nak in hramhram tangka chuh, mithah, tlaihhrem tibantuk in a rak um ve ko nain a tlawm. Tu cu tangka chuh, mizapi hmai ah thahnawnnak hna a chuak, ngakchia kumtling lo tlaihhrem hna a tam chin. Anmah tuanvo ngeitu hna nih an chim tawnmi cu thleidannak a um lomi upadi a um lawngah upadi nawlngeihnak (upadi tangah mipaoh i tluknak) a um kho lai an ti tawn. Asi ahcun thleidannak a ngei lomi upadi kan ngeih khawhnak dingah hodah tuanvo a ngei. Anmah cu pei mizapi nih kan zumh hna i cubantuk rian tuanding ah kan thim hna cu. Hluttaw chung ralkap mee tello tein phunghram pi ti lo zei upadi paoh remhkhawhnak nawl an ngei.
TCP: Ramkhel buainak nih a temtawn i mi ramdang nak in sifahnak ah hnu a tolhmi Kawlram dirhmun hi zeiruangah dah a si tiah na ruah?
Pu No Than Kap, CPP Chairman: Keimah siseh MP hna zong cozah chung ah naihniam tak in kan luh khawh lo tikah a lengin kan hmuhning lawng a si i nihin kan ram ah chawlehthalnak lei i kan tlak chinmi hna hi hngalhfian a har ngai ka ti ve. Pakhat ka ruahmi bel cu rampi runvennak tiin ralkap caah rampi tangka zatuak 14% tluk hman a si. Hi tangka hi kan ram thanchonak caah i hmang sehlaw cu a kan thathnem deuh ngai hnga tiah pakhatnak ka hmuhning a si. Cun nihin Cozah hruainak ah a chung rian tuantu hna hi hmuhtonnak le thiamnak tak tak a ngei mi an um lo hlah maw? an um ko lai nain zeitindah kan ram buainak hi a thatnak ding lamdang hna in an kawl i a si hnga maw ti hi ka ruahmi a si.
(2017 kum Thantlang ah tuahmi Chin National Dialouge ah a rak phanmi Chin Ramkhel party in hruaitu lubik cheukhat cu Chinland Post nih biaruahnak kan rak ngeihmi hna an si.)
About The Author
