May 21, 2024

Ramkomh Minister Le Chief Minister Thlen Dingmi Ah CM Salai Lian Luai Aa Tel Ve Maw?

0

City Hunter| 2018 April 26| A ralaimi May thla chung ah ramkomh minister le ramkulh, ramthen Chief Minister cheukhat rian thlennak tuahding le May 14- ramkomh cozah bu tonpumhnak tuah tikah ramkomh minister le Chief Minister cheukhat rian thlennak a um lai tiah Naypyidaw ummi pakhat sin in thawngpang a chuak.

May 14 meeting ah ramkomh minister zung pathum in minister pathum min chuahpi le rian thlennak an tuah lai. Hi hlan ah ramthen le ramkulh in Chief Minister pathum cu rampi President thar U Win Myint nih thlennak a tuah lai tiah Naypyidaw ummi tuanvo ngeitu pakhat sin in thawngpang a chuak.

“President U Win Myint kumthar biarocah ah aa tel bantuk in cozah bu thlennak a um lai. Ramkomh minister thlen ding in thawngpang a chuakmi cu zung pathum cu; Ministry of Education (Dr. Myo Thein Gyi), Ministry of Industry (Khin Maung Cho), Ministry of Agriculture, Livestock and Irrigation (Dr. Aung Thu) zung an si. Mah zung pathum in thlennak a chuak lai ti a si nain anmah aiah mi zeidah an airawl lai timi cazin a chuak lo. Hi pathum lakah hin Fimcawnnak Ministry zung hi chimceih bikmi a si” tiah Naypyidaw ummi upa pakhat pakhat nih a ruahdamhnak kong a chim.

Cu bantuk in April 25 ah thawngpang pakhat a chuakmi cu President hlun U Htyin Kyaw nupi zong a si i atulio Tungkhuah peng in Pyithu hluttaw palai MP Daw Su Su Lwin cu fimcawnnak minister rian an pek lai tiah Kawl media kip nih an thanh cio dih colh. Asinain, a fekmi thawngpang a si rih lo.

NLD cozah hruaimi cozah kum hnih a hung tlin tikah thlennak pakhat tal a tuah kho lomi ministry zung in ramkomh minister le Chief Minister pawl thlen a duhnak hna kong zong Naypyidaw ummi upa pakhat nihcun a chim.

Chief Minister thlen timhmi hi Pago ramthen, Taningthari ramthen le Kachin ramkulh in an si kho tiah NLD party upa he aa naihniammi pakhat nih a chim. Cu bantuk in nihin tiang Chief Minister thlen ding tiah thawng a chuakmi ah Chin ramkulh Chief Minister Salai Lian Luai cu aa tel rih lo tiah kan theih.

March 30, President rian a cohlan ni biakamnak biarocah ah President U Win Myint nih thlennak riantuan a khulnuarmi zung le bu hna cu zohfel le rengh deuh an si lai tiah a chim. Cu pin ah Kumthar biarocah chimnak zong ah thlennek he aa rup lomi riantuantu hna cu a thekvak a tha i a fimmi (quality) hna he thlen herh ahcun kan thlen lai tiah President U Win Myint nih a chimchih.
Ref: 7Day News, DVB Burmese News

About The Author

Na ruahning rak langhter ve.. (Leave a comment)

%d bloggers like this: