Rampi sipuazi ṭhanchonak fund chung in Chin ramkulh nih 10 billion a ngah ko nain a cawimi an um rih lo
The Chinland Post | 2022 August 24 – Ministry of Finance nih kokek thlichia le thil ṭihnung he aa pehtlaimi caah fund 400 billion chungin rampi sipuazi ṭhanchoternak caah tiah Chin ramkulh nih 10 billion a co ko nain atutiang a cawmi an um rih lo tiah Mizzima nih a langhter.
A luancia August 12 Naypyitaw ah peng le ramṭhen kip Chief Minister pawl an auh hna i bawmhnak an pekmi chungin Kayah, Chin le Rakhine hna ah Mya-sein-yaung project zalong tein ṭuanchuah khawhnak caah 10 billion an rak pek.
“GAD zung ah biaknak lei upa pawl, khuanu khuapa le rianngeitu pawl auh in an rak langhter. SAC nih sipuazi caah tiah 10 billion a ngah. Cucu peng kip ah an cheuh lai, hodah aa cawi duh? zeidah tuah nan duh tiah an rak chimh hna. Asinain a hohmanh nih an i cawi ngam lo. Mino (CDF) nih tender rian pawl an khap cu mu, an ṭih cio dih. A cheu cu cawi an duh ko” tiah meeting a kaimi pakhat nih Mizzima ah a chim.
Mya-sein-yaung project timi cu khuate hna ah a sifakmi pawl rian an ṭuan khawhnak hnga khuate mipi pawl an pawcawmnak ṭhanchoter le chungkhar tangka hmuhnak karh seh timi ruahchannak he khuate 11,643 ah a zin hmuh ti lomi fund dirhmun in khuate pakhat ah 30 million chiah piak in, a karhmi tangka pawl kha khuate fund caah chia in khuate mipi sin ah cawih ṭhannak le khuate ṭhanchonak rian pawl rianṭuannak kha Ministry of Agriculture, Livestock and Irrigation le Ministry of Cooperatives and Rural Development nih an i hmaitlakmi rian a si.
Chin ramkulh ah zeibantuk tender rian hmanh an ṭuan lo i tender a ngahmi company pawl zong rian an ṭuan khawh lo caah tangka an ap ṭhan tiah theih a si.
Hmanthlak – SALAI PRODUCTION
About The Author
