Reuters Thawnglatu Pahnih Tel In Thongtla 6,520 Thonginn In An Chuah Hna
TCP-Hakha| 2019 May 7| Reuters thawnglatu pahnih telh in Myanmar ram thongtla 6520 cu rampi President U Win Myint nih May 7 ah sualnak ngaithiam in thonginn in luatnak a pek hna.
Hi thongtla 6520 chuahmi ah Insein thong in a luatmi lakah Reuters thawnglatu Ko Lung Wah le Ko Kyaw Soe zong an i tel. President nih avoi 3nak thongtla a chuahmi ah lemcang thiam Moe Aung Yin zong aa tel ve.
Ko Wah Lung nih, “Atu bantuk in kan chuah khawhnak ding ah a kapkip in a kan bawmtu, a kan tanpi, ramchung ramleng thapetu zapi cung ah kan i lawm” tiah a chim.
Myanmar kumthar philhlonak in siseh, mizapi thinlung damnak le zawnruahnak kha biapi chiahnak in siseh, rampi cozah nih remdaihnak rian a tuanmi a tluannak ding le miphun tunmernak ding bawmtu a sinak ding caah thongtla 6,520 cu ya-za-wat phung upadi pohmah 401- pohmah then (1) ning in zeihmanh rikhiahmi um lo in luatdaihnak pek an si tiah President zung nawlchuahmi ah an langhter.
April 17 zong ah rammi thongtla 9,535 le ramdang mi thongtla 16 cu President nih a hmasabik luatdaihnak pek in a rak chuah bal cang hna. Cu pin ah April 26 ah thongtla 6,948 cu President nih avoi 2nak luatdaihnak a rak pek thiamthiam hna. A luancia April thla le May thla chung ah President nih voithum luatdaihnak pek in thongtla a chuahmi hna zapi hi 23,000 renglo an si cang i hi chung ah ramkhel thongla zong an i tel tiah theih a si.
Ref: DVB, 7Day News, President Office
About The Author
